نیشنل کانفرنسَس خٕلاف منفی پروپیگنڈا پھیلاوَن والٮ۪ن ہٕنٛز چھِنہٕ کانٛہہ کٔمی: صوبائی صدر

نیشنل کانفرنسُک صوبائی صدر ایڈووکیٹ شوکت احمد میرن ووٚن زِ نیشنل کانفرنسَن چھِ پتھ کالہٕ پیٹھٕ از تام مُشکِل ترین حالات، سٲزِشن تہٕ کٔشیٖرِ خٕلاف پالیسیَن ہُنٛد مُقابلہٕ کوٚرمُت، تہٕ عوامٕک مددٕ سۭتۍ روزِ یہِ تِمن سارِنٕے عُنصرن ہٕنٛدِس ارادَن ناکام بناوان یِم جموں و کشمیرٕچ شناخت کمزور کرنٕچ کوٗشِش چھِ کران۔
تٔمۍ ووٚن زِ نیشنل کانفرنسَس خٕلاف منفی پروپیگنڈا پھیلاوَن والٮ۪ن ہٕنٛز چھَنہٕ کانٛہہ کٔمی۔ وونہِ گو٘ کٲشرِ لوٗکھ چھِ باخَر تہٕ جان پٲٹھہِ زانان زِ رِیاستَس کٔمۍ کٔر دلدلس منٛز تہٕ کٔمۍ کٔر عوامٕک مفادَس سٍتۍ سمجھوتہٕ۔
یِمَن خیالاتن ہُنٛد اظہار کوٚر اَز سرینگرَس منٛز نیشنل کانفرنس ہیڈ کوارٹرَس منٛز پارٹی رہنُماہن تہٕ عہدیدارَن ہٕنٛدِس أکِس اجلاسَس خٕطاب کٔرِتھ۔
شوکت میرَن دِیُت پارٹی کارکُنَن زور زِ تِم کٔرِن بڈگام اسمبلی سیٹَن ہٕنٛدِس ضمنی انتخابَس منٛز پوٗرٕ پٲٹھۍ حصہٕ نِنہٕ تہٕ تِم گژھن گَرِ گَرِ گژھِتھ عوام پارٹی منشور تہٕ عمر عبداللہ سٕنٛدِس قیادتس منٛز حکومتٕچ اکہِ ؤرۍ یِچ کارکردٕگی مُتعلِق زانکٲری دِنہٕ۔