گاندربل پولیسَن کوٚر سِم کارڈ فروشَن ہٕنٛدٮ۪ن دُکانَن ہُنٛد معٲینہٕ

جموں و کشمیر پولیسَن ترٛوو گاندربل ضِلعَس منٛز سِم کارڈ کٕنَن والٮ۪ن مرکزَن پٮ۪ٹھ اچانک چھاپہٕ تاکہ جعلی دستاویزَو ذٔریعہٕ جٲری کرنہٕ آمٕتۍ سِم کارڈَن تہٕ نمبرَن ہُنٛد غلط استعمال یِیہِ قوبوٗ کرنہٕ۔ یہِ کاروٲیی آیہِ سپرنٹنڈنٹ آف پولیس گاندربل خلیل احمد پسوال سٕنٛدِس ہدایتس تحت کرنہٕ۔ پُلیٖس ترجمانَس مُطٲبِق آو اچانک معٲینہٕ یہِ یٔقیٖنی بناونہٕ خٲطرٕ کرنہٕ زِ تمام سِم کارڈ دُکان گژھن تصدیقی قونوٗنَن پٮ۪ٹھ سختی سان عمل کرٕنۍ تہٕ یہِ زِ کانٛہہ تہِ سِم کارڈ یِیہِ نہٕ نقلی یا غٲر تصدیق شُدٕ شناختَن تحت جٲری کرنہٕ، یِم پتہٕ غٲر قونوٗنی سرگرمیَن باپتھ استعمال کرنہٕ یِوان چھِ ۔ کاروٲیی دوران کٔر پُلیٖس ٹیٖمَن ضِلعہٕ کٮ۪ن مُختٔلِف پُلیٖس تھانہٕ کِس دائرہ اختیارَس منٛز واقع سِم کارڈ کٕننٕکۍ مرکزَن ہُنٛد پوٗرٕ پٲٹھۍ معٲینہٕ، یِمَن منٛز گاندربل، کھیر بھوانی، صفا پورہ، لار، گُنٛڈ تہٕ پوسٹ شادی پورہ شٲمِل چھِ۔ پُلیٖس اہلکارَو کٔر یِمَن دُکانَن منٛز گراہکَن ہٕنٛدِ تصدیقی ریکارڈ، سیلز رجسٹر، تہٕ باقی مُتعلقہٕ دستاویزَن ہُنٛد جٲیزٕ تاکہِ یہِ معاینہٕ گژِھہ زِ سِم کارڈ جٲری کرنَس منٛز ما چھےٚ کانٛہہ خلاف ورزی گٔمٕژ۔