جموں و کشمیر کٮ۪ن دور دراز علاقَن منٛز چھُ جٔدیٖد صحتٕچ سٔہوٗلِیات تھاوٕنۍ ضٔروٗری: منوج سنہا

جموں و کشمیرٕکۍ لیفٹیننٹ گورنر منوج سنہاہَن ووٚن زِ جٔدیٖد تہٕ اعلیٰ معیارٕچ طِبی سٔہوٗلِیات گژھِ نہٕ بَڑٮ۪ن شہرَن تہٕ ژارنہٕ آمٕتۍ طِبی اِدارَن تام محدوٗد آسٕنۍ۔ امہِ بدلہٕ گژھِ دوٗر دراز، پہٲڑی تہٕ لۄکٹٮ۪ن ضِلعن منٛز روزَن وٲلۍ لُکن تہِ جدید علاجٕچ رسٲیی حٲصِل کرنہٕ یِنۍ۔ یہِ بیان دِیُت تٔمۍ سرینگرَس منٛز شیر کشمیر انٹرنیشنل کنونشن سینٹرس منٛز ‘کواٹرنری ہیلتھ کیئرس پیٹھ قومی سربراہی اجلاس: ایڈوانسڈ کیئر خٲطرٕ اکھ قومی حکمت عملی’ کِس افتتٲحی اجلاسَس منٛز خطاب کران۔اَتھ اجلاسَس منٛز کٔر ڈاکٹر، محققین، ساینسدان، صحت کِس مٲہِر، ہیلتھ ایڈمنسٹریٹر، تہٕ مُختٔلِف ادارن ہٕنٛدۍ نُمایندٕ شرکت۔ منوج سنہاہَن ووٚن زِ جٔدیٖد صحتٕچ سہولیاتَن تہٕ یِمَو نِش فٲیدٕ تُلَن والٮ۪ن مریضَن درمیان چھُ وُنہِ تہِ واضح فَرق۔