یِنہٕ وٲلِس ہفتس منز وادی کٔشیٖرِ منٛز روٗد تہٕ شیٖن پیٚنُک اِمکان

وادی کشمیر تہٕ جموں علاقس منٛز چھِ یِنہٕ وٲلِس ہفتس دوران موسمس منٛز وارٕ وارٕ تبدیلی ہُند امکان۔ موسمٕچ تازٕ ترین پیشن گویی مُطٲبِق چُھ مُختٔلِف جاین روٗد پیٚنُک تہٕ تھدٮ۪ن پہٲڑی علاقن منٛز ہلکہٕ شیٖن پیٚنُک اِمکان۔ تاہم، کُنہِ بٔڑ یا شدید موسمی واقعاتن ہٕنٛز پیشن گویی چھنہٕ یوان کرنہٕ۔مٲہرِ موسمیات فیضان عارف کانگَن ووٚن یوٗ این آئی یَس زِ 8 مارٕچ دۄہ چھُ جموں و کشمیر کٮ۪ن زِیٛادٕ تر حِصَن منٛز موسم عام طور خۄشٕک روزنُک امکان، یَتھ منٛز سٲرِسٕے دۄہَس آسمان صاف یا رَژھا اوٚبُر روزِ۔9 مارٕچ دۄہ ہیٚکہِ موسمَس منٛز معمولی تبدیلی وُچھنہٕ یِتھ۔ امہِ دۄہ چھُ آسمانس کُنہِ حدس تام اوٚبُر آسنُک امکان، ییٚلہِ زَن دۄہہ کِس دوٚیمِس نصفس منٛز ہیکہِ کینٛہَن جاین ہلکہٕ روٗد پیٚتھ۔ خاص طور پٲٹھۍ چھُ وننہٕ یِوان زِ گندر بل، بندی پورا، کپواڑہ تہٕ بارامولا کٮ۪ن ہیٚرمِین علاقن منٛز چھُ روٗدُک نسبتاً زیادٕ اِمکان۔ دوٚیمہِ طرفہٕ چھُ جموں خطہٕ کٮ۪ن زِیٛادٕ تر حِصن منٛز موسم زیادٕ تر خۄشٕک روزنُک اِمکان۔موسمٕچ پیشن گویی مُطٲبِق چھُ 10 مارٕچ وادی کشمیر کٮ۪ن واریاہَن علاقَن منٛز ہلکہٕ پٮ۪ٹھٕ درمیٲنی روٗد پیٚنُک امکان۔