اننت ناگَس منٛز ییٚمہِ ؤریہِ 43 ڈرگ ڈِیلَر گِرِفتار کرنہٕ، 35 معاملہٕ درٕج، 25 ہاٹ سپاٹَن ہٕنٛز شناخت۔

حکامَن مُطٲبِق چھِ منشیاتَن خٕلاف جٲری کارروائیَن منٛز میڈیکل لائسنس، ڈرایوِنٛگ لایسَنس تہٕ گاڑِ معطل یا منسوخ کرٕنۍ تہِ شٲمِل۔ جنوٗبی کشمیر کِس اننت ناگ ضِلعس منٛز چھِ ییٚمہِ ؤرۍ یہِ وُنیُک تام اہم تہٕ ٹھوس پیش رفت وُچھنہٕ آمٕژ، ییٚتہِ تقریباً ژور درجن ڈرگ ڈِلَر گِرِفتار چھِ کٔرمٕتۍ، تہٕ سۭتی چھِ منشیاتُک نیٹ ورک ختم کرنٕچ واریاہ کوٗشِشہِ کرنہٕ آمٕژ۔ جنوری 2026 پیٹھٕ چھِ نارکوٹک ڈرگ اینڈ سائیکو ٹراپِک سبسٹانسز (این ڈی پی ایس) ایکٹَس تحت 35 مقدمہٕ درٕج کرنہٕ آمٕتۍ، یِمَن منٛز 43 نفر شٲمِل چھِ یِم گرفتار چھِ کرنہٕ آمٕتۍ۔ اَمہِ سۭتۍ چھِ پوٗرٕ ضِلعَس منٛز 25 حساس مقامَن (ہاٹ سپاٹ) ہٕنٛز نشاندہی کرنہٕ آمٕژ ییٚتہِ منشیاتٕچ سرگرمی زِیٛادٕ چھِ، تہٕ تَتہِ چھِ خصوٗصی نگرٲنی تہٕ کاروٲیی یٔقیٖنی بناونہٕ یِوان۔ حُکامَن ہِنٛدِ دٔسہِ دِنہٕ آمُت اعداد و شمار چھُ اِشارٕ دِوان زِ ضِلعَس منٛز چھِ افیم غٲر قونوٗنی وۄپداونَس منٛز 95 فی صٔدی تام کٔمی آمٕژ، یۄس اکھ بٔڑ کامیٲبی ماننہٕ یِوان چھِ۔