پُلیٖسچ شُمالس تہٕ جنوبَس منٛز منشیات اسمگلِنگ خٕلاف کاروٲیی جٲری اننت ناگ تہٕ بارامولا ہس منٛز 7 سمگلر گِرِفتار، بٔڑِس مقدارس منٛز ممنوعہ مادٕ ضبط۔
منشیاتٕچ سَمَگلِنگ خٕلاف پنٕنہِ جٲری مُہِم جٲری تھٲوِتھ کٔر پُلسن اننت ناگ تہٕ بارامولا ہَس منٛز الگ الگ کارروائیَن منٛز سَتھ ڈرٛگ ڈِلَر گِرِفتار کٔرِتھ اکھ بٔڑ کامیٲبی حٲصِل، تہٕ یِمَن نِش کٔرٕکھ بٔڑِس مقدارس منٛز ممنوعہ مادٕ ضبط۔ سی این آیی مُطٲبِق کوٚر جنوٗبی اننت ناگ ضِلعہٕ کِس شانگوس علاقَس منٛز پولیسَن اکھ ڈرگ ڈیلر گِرِفتار۔ پُلسہٕ ترجمانَن مُطٲبِق آیہِ شانگوس اننت ناگَس منٛز پٹی شیخ پورہٕکۍ روزَن وٲلۍ غلام رسول شیخ سُنٛد نیٚچُو ریاض احمد شیخ تہٕ دادپورہ بارامٕکۍ روزَن وٲلۍ محمد لطیف سُنٛد نیٚچُو ریاض شیخ تہٕ عادل لطیف گِرِفتار کرنہٕ تہٕ تقریباً 5.75 کِلوگرام چرٕس آو برآمد کرنہٕ۔ یِتھے پٲٹھۍ آو سنگم چوکَس منٛز ناٹی پورہ سنگمٕکۍ روزَن وٲلۍ غلام محمد لون سُنٛد نیٚچُو ثاقب احمد لون 140 گرام چرس ہیتھ گرفتار کرنہٕ۔ اَمہِ علاوٕ کٔر بمزو کے پی روڈَس پٮ۪ٹھ أکِس چوکی دوران پُلیٖس پارٹی نٔو کالونی مٹنٕکۍ روزَن وٲلۍ علی محمد موچی سُنٛد نیٚچُو ریاض احمد موچی 5.24 کِلوگرام چرس سۭتۍ گِرِفتار۔