شری امرناتھ یاترا: 6000 کھۄتہٕ زِیٛادٕ زائرینن ہُنٛد ترٛیٚیِم قٲفلہٕ جۅم بیس کیمپٕ پٮ۪ٹھٕ روانہٕ

از صُبحٲے شری امرناتھ جی یاترا یہِ خٲطرٕ یاترِین ہُنٛد ترٛیٚیِم قٲفلہٕ گوٚو سخٕت سیکورٹی اِنتِظامَن تحت بھگوتی نگر بیس کیمپٕ پٮ۪ٹھٕ کٔشیٖرِ کُن روانہٕ۔ بھروسہٕ مند ذٔرایعو دِژ اطلاع زِ جُمعہ دۄہ صُبحٲے آیہِ بھگوتی نگر بیس کیمپٕ پٮ۪ٹھٕ 291 لۄکٹٮ۪ن تہٕ بٔڑٮ۪ن گاڑیٚن منٛز کُل 6,411 زائرین کٔشیٖر سوزنہٕ۔ تِمَو کوٚر ذِکِر زِ یِمَن زائرین منٛز چھِ 4,723 مرد، 1,071 زنانہٕ، 37 شُرۍ، 407 سادھو تہٕ 93 سادھوی شٲمِل۔ حکامَو ووٚن زِ 2,789 زائرین ٲسۍ بالتال بیس کیمپس کُن گژھان ییٚلہِ زَن 3,622 زائرین نُنوان پہلگام بیس کیمپس کُن گژھان ٲسۍ۔ جٔنوٗبی کٔشیٖرِ ہِنٛدیٚن ہِمالیٲیی پہاڑن منٛز 3,880 میٖٹر تھزرس پیٚٹھ واقع شِری اَمرناتھ منٛدرٕچ سالانہٕ یاترا گٔیہِ برٮ۪سوارِ دۄہ صُبحٲے سخٕت حِفاظتی اِنتِظامَن درمیان سرکٲرِۍ طور شُروٗع۔ ییٚمہِ ؤریہِ روزِ یہِ یاترا 38 دۄہَن تام جٲری تہٕ 9 اگست سپدِ رکشا بندھن کِس موقعس پٮ۪ٹھ ختٕم۔