أسۍ زینِو بڈگام تہٕ نگروٹہ دۄشوٕے حلقہٕ: سریندر چودھری

جموں و کشمیرٕکۍ نٲیِب وزیر اعلیٰ سریندر چودھری یَن کوٚر دعویٰ زِ نیشنل کانفرنس کرِ بڈگام تہٕ نگروٹہ اسمبلی دۄشوٕے سیٹہٕ محفوظ۔ تٔمۍ ووٚن زِ عمر عبداللہ سٕنٛدِس قیادتَس منٛز چھِ حکومت لوٗکَن باپتھ بہتر سڑکہِ ہُنٛد بُنیٲدی ڈھانچہٕ فراہم کرنہٕ باپتھ پرعزم ۔ نٲیِب وزیر اعلیٰ ہَن کوٚر بَٹہٕ وارِ دۄہ یَتہِ نامہ نگارن سۭتۍ کتھ کران یِمن خیالاتن ہُنٛد اِظہار۔ تٔمۍ ووٚن: ‘یِم منصوبہٕ ؤری وادو پٮ۪ٹھٕ رُکاونہٕ آمٕتۍ چھِ تِم چھِ مُکمل کرنہٕ یِوان، تہٕ عمر عبداللہ سٕنٛزِ حکومتہٕ طرفہٕ لوٗکَن سۭتۍ کرنہٕ آمٕتۍ وعدٕ چھِ اَکہِ پتہٕ اکھ پوٗرٕ گژھان۔ تٔمۍ ووٚن بیٚیہ: ‘پٔتِمہِ حکومتٕچ نامکمل کٲم پوٗرٕ کرنٕچ کوٗشش چھےٚ یِوان کرنہٕ۔ اگر تٔمۍ حکوٗمتَن پنٕنۍ کٲم پوٗرٕ کٔرمٕژ آسہِ ہے، انڈسٹریل نگر کٔدٕل آسِہا نہٕ از تہِ نامکمل ۔’تٔمۍ ووٚن زِ حکوٗمت چھِ پرٲنۍ پرٛوجیٚکٹ پوٗرٕ کران تہٕ نٔوۍ تہِ شُروٗع کَران۔ بڈگام تہٕ نگروٹہ ضمنی چُناون مُتعلِق پرژھنہٕ پتہٕ ووٚن سریندر چودھریَن زِ: ‘نگروٹہس منٛز ٲس عمر عبداللہ سٕنٛز اکھ بٔڑ ریلی۔ أسۍ زیٖنو بڈگام تہٕ نگروٹہ دۄشوٕے سیٖٹہٕ۔’