20دسمبرس تام چھُنہٕ کٔشیٖرِ منٛز موسمَس منٛز کانٛہہ بٔڑ تبدیلی متوقع

سخت ونٛدَس دوران چھُ محکمہٕ موسمیاتَن 20 دسمبر تام وادی کشمیر کِس موسمَس منٛز کُنہِ خاص تبدیلی نِش انکار کوٚرمُت۔ محکمٕکۍ ترجمانَن ووٚن زِ 9 دسمبر ہیکہِ وادی ہٕنٛدِس موسمس منٛز کُنہِ حدس تام عام طور اۅبُر ٲسِتھ۔ تِمَو ووٚن زِ 10 پٮ۪ٹھٕ 12 دسمبر تام چھُ آسمانَس کُنہِ حدس تام اوٚبُر مگر خۄشٕک آسنُک چُھ امکان۔ تِمَو ووٚن زِ پتہٕ 13 پٮ۪ٹھٕ 15 دسمبر تام کمزور مغربی خلل کہِ دٲخل گژھنہٕ کِنۍ روزِ آسمانس اۅبُر تہٕ صُبحَس یا شامَس شُمٲلی تہٕ وسطی کشمیر کٮ۪ن پہٲڑی علاقن منٛز چُھ ہلکہٕ شیٖن پیٚنُک اِمکان۔ ترجمانَن ووٚن بیٚیہِ زِ 16 پٮ۪ٹھٕ 19 دسمبرس تام روزِ وادی ہٕنٛدِس موسمس بیٚیہِ کُنہِ حدس تام اۅبُر ییٚلہِ زَن 20 دسمبر ہیکہِ عام طور اۅبُر ٲسِتھ۔ تِمَو ووٚن زِ 21 تہٕ 22 دسمبر چھُ آسمانَس اۅبُر روزُنُک تہٕ کینٛہن پہٲڑی علاقَن منٛز ہلکہٕ شیٖن پیٚنُک امکان۔ پننہِ ایڈوائزری منٛز ووٚن محکمَن زِ اتھ عرصَس دوران ہیکہِ کٔشیٖرِ ہٕنٛدٮ۪ن مُختلِف حِصَن منٛز درمیٲنی پٮ۪ٹھٕ ہلکہٕ وُنل برقرار روزِتھ۔