گڈز اینڈ سروسز ٹیکس (ترمیمی) بل: سجاد لونن کوٚر اسمبلی نٮ۪بر واک آوٹ، ووٚنُن زِ یہِ چھےٚ جموں و کشمیر یو ٹی حیثیتٕچ توثیق۔

پیپلز کانفرنسٕکۍ صدر تہٕ ایم ایل اے سجاد لون کوٚر بۄموارِ دۄہ اسمبلی پٮ۪ٹھ واک آوٹ ییٚلہِ حکوٗمتَن اسمبلی منٛز گڈز اینڈ سروسز ٹیکس (ترمیمی) بل 2025 پیش کوٚر۔

تٔمۍ ووٚن زِ اَمہِ بِلہِ ہُنٛد مقصد اوس جموں و کشمیر رِیاست بدلہٕ کُٹ لفٕظ شٲمِل کرُن۔

واک آؤٹ پتہٕ ووٚن ایم ایل اے یَن ‘ایکس’ پٮ۪ٹھ أکِس زیوٗٹھ پوسٹَس منٛز: "آز مےٚ گوٚو اسمبلی منٛزٕ واک آؤٹ ییٚلہِ حکوٗمتَن گڈز اینڈ سروِسز ایکٹ کِس سیکشن 2 منٛز ترمیم کرنہٕ خٲطرٕ اکھ بل پیش کوٚر۔