بڈگام ضمنی چُناوس منٛزپی ڈی پی پارٹی ہٕنٛز مسلسل برتری برقرار

بڈگام اسمبلی ضمنی چُناوس منٛز چھےٚ پیپلز ڈیموکریٹک پارٹی (پی ڈی پی) وۄمیدوار آغا سید منتظرس پننِس قریبی حریف نیشنل کانفرنس (این سی) وۄمیدوار آغا سید محمودَس پیٹھ لَگاتار برتری برقرار۔

الیکشن کمیشن آف انڈیا کہِ طرفہٕ جٲری کرنہٕ آمتٮ۪ن تازٕ ترین نتائجَو مُطٲبِق چھِ 11 مِس راؤنڈَس منٛز پی ڈی پی وۅمیدوار آغا سید منتظرن 16,663 ووٹ حٲصِل کٔرمٕتۍ، ییٚلہِ زَن نیشنل کانفرنسَس قریبی حریف آغا سید محمودَس چھِ 13,049 ووٹ حٲصِل گٔمٕتۍ، ییٚمہِ سۭتۍ پی ڈی پی امیدوارَس 3,614 ووٹَن ہنز برتری چھےٚ۔

نذیر خانَن چھِ 2,786 ووٹ حٲصِل کٔرمٕتۍ، ییٚلہِ زَن محمد سمیر بٹَس چھِ 2,423 ووٹ حٲصِل ۔

بڈگامٕچ سیٹ گٔیہِ خٲلی ییٚلہِ ؤزیٖرِ اعلیٰ عمر عبداللہ ہَن سیٹہِ پٮ۪ٹھ اِستِفہٕ دِیُت تہٕ گاندربل سیٹ برقرار تھاونُک اعلان کوٚر۔

یہِ چھُ قٲبلِ ذِکِر زِ 11 نومبر سپدن والٮ۪ن ضمنی چُناون منٛز دیُت 50 فیصد کھۄتہٕ زیٛادٕ ووٹرَو پنُن ووٹ۔

بڈگام اسمبلی حلقَس منٛز چھِ کُل 1.26 لَچھ کھۄتہٕ زِیٛادٕ درٕج شُدٕ ووٹر ۔