شوپیانَس منٛز گاڑٮ۪ن تہٕ ڈیلر ریکارڈَن ہُنٛد معٲینہٕ شُروٗع: پولیس

جموں و کشمیر پولیسَن چھُ جنوٗبی کشمیر کِس شوپیاں ضِلعَس منٛز مُختٔلِف گاڑِ ڈیلرَن نِش گاڑٮ۪ن تہٕ ریکارڈَن ہُنٛد معٲینہٕ کرُن شُروٗع کوٚرمُت۔
پولیسَن ووٚن زِ اَمہِ اقدامُک مقصد چھُ گاڑٮ۪ن ہِنٛدِس مۅلۍ ہینَس تہٕ کٕننس منٛز شفافیت یقینی بناوٕنۍ تہٕ گاڑٮ۪ن ہُنٛد مُمکِنہٕ غلط استعمال رُکاوُن۔
تِمَو ووٚن زِ اَتھ مُہمہِ دوران کٔر پُلیٖس ٹیٖمَو شو رومَن منٛز موجود گاڑِین ہِنٛز تلٲشی تہٕ نِیوٗکھ فروخت، خٔریٖدٲری تہٕ مِلکِیت ہِنٛزِ منتقلی مُتعلق دستاویزَن ہُنٛد جٲیزٕ۔
تِمَو ووٚن زِ لین دین ریکارڈٕچ درستگی ہٕنٛز تصدیق ، ملکیتٕچ بروقت منتقلی، تہٕ کُنہِ تہِ بے ضابطگی ہٕنٛز نشاندہی کرنس پٮ۪ٹھ چھِےٚ خاص توجہ دِنہٕ یِوان یُس غٲر قونوٗنی استعمالُک بٲعث ہیٚکہِ بٔنِتھ۔
پُلیٖس ترجمانَن ووٚن زِ گاڑِ ڈیلرَن چھُ ہدایت دِنہٕ آمُت زِ تِم تھاوَن گاڑٮ۪ن ہٕنٛدِ تمام لین دینُک مُکمل، صحیٖح تہٕ تازٕ ترین ریکارڈ تہٕ کٮرن قونوٗنی ضروٗرتَن پٮ۪ٹھ سختی سان عمل ۔
تِمَو ووٚن زِ پُلیٖس ٹیٖمَو دِژ ڈیلرَن منظم ریکارڈ تھاونہٕ کِس اہمیتَس مُتعلِق تہِ اِطلاع ، ییٚمہِ سۭتۍ ضِلعَس منٛز مجموعی حِفٲظتی نظام مضبوٗط بناونَس منٛز مدد میلہِ۔