کٔشیٖرِ منٛز ونٛدٕ تیز، سریٖنگرَس منٛز آو کم از کم رٲژ ہُنٛد درجہٕ حرارت منفی 3.7 ڈگری سیلسیس ریکارڈ ۔

وادی کٔشیٖرِ منٛز چُھ ونٛدٕ تیز گوٚمُت، ییٚمہِ کِنۍ لوٗکھ گَرَن اندر روزنَس پٮ۪ٹھ مجبوٗر چھِ، خاص کٔرِتھ صُبحَس تہٕ شامَس منٛز۔
محکمہٕ موسمیات مُطٲبِق آو رٮ۪تہٕ کالہِ ہٕنٛز رازدٲنی سرینگرَس منٛز کم از کم درجہٕ حرارت منفی 3.7 ڈگری سیلسیس ریکارڈ کرنہٕ، ییٚلہِ زَن راتھ رٲژ ہُنٛد درجہٕ حرارت منفی 2.5 ڈگری سیلسیس ریکارڈ کرنہٕ آو۔
کٔشیٖرِ ہُنٛد جٔنوٗبی ضِلعہٕ پلوامہ روٗد وادی ہُنٛد سارِوٕے کھۄتہٕ سرد علاقہٕ، یَتھ منٛز کم از کم درجہٕ حرارت منفی 5.1 ڈگری سیلسیس اوس، ییٚلہِ زَن شوپیاں ضِلعَس منٛز آو کم از کم درجہٕ حرارت منفی 5.0 ڈگری سیلسیس ریکارڈ کرنہٕ۔
وادی ہٕنٛدِس مشہوٗر سیاحتی مُقام پہلگامَس منٛز آو کم از کم درجہٕ حرارت منفی 4.8 ڈگری سیلسیس ریکارڈ کرنہٕ، ییٚلہِ زَن راتھ رٲژ درجہٕ حرارت منفی 0.4 ڈگری سیلسیس اوس۔
وادی ہٕنٛدِس ساروٕے کھۄتہٕ مشہوٗر سیاحتی مقام گُلمرگہِ منٛز آو کم از کم درجہٕ حرارت منفی 2.5 ڈگری سیلسیس ریکارڈ کرنہٕ، یُس راتھ رٲژ برابر اوس۔