سرینگر پولیس پبلک ایڈوائزری: محرمُک جلوس امن و امان سان کڈنچ اَپیل*نظم و ضبط تہٕ فرقہ وارانہ ہم آہنگی برقرار تھونچ ہدايت؛ شٲمل گژھن والین خٲطرہ کیا کَرُن تہٕ کِیاہ نہ کَرُن ہُنٛد فِہرِست جاری*

محرم الحرام برونٹھ، سرینگر پولیسن چھےٚ اکھ پبلک ایڈوائزری (عوامی مصلحت) جاری کٔرمژ، یَتھ مَنٛز لۆکن ہُنٛد سٟتؠ اَپیل کَرنہٕ آمژ چھےٚ زِ تِم دِین جلوس امن، وقار تہٕ نظم و ضبط سان کٔڈنہِ مَنٛز تعاوُن۔جی این ایسَس مِلنہٕ آمژِ اکہِ پریس ریلیزِ مُطٲبِق، پولیسن وۆن زِ پورہِ جلوسس دوران پَزِ امن، نظم و ضبط تہٕ فرقہ وارانہ ہم آہنگی برقرار تھون۔ * انتظامیہ تہٕ پولیس حکامَن طرفہٕ دِتہِ آمژَن تَمام ہدايتن پؠٹھ پَزِ عَمَل کَرُن۔ ٹریفک پولیس تہٕ رضا کارن (Volunteers) سٟتؠ پَزِ تعاوُن کَرُن تاکہِ آمد و رفت مَنٛز کانہہ رُکاوَٹ گژھِ نہِ۔ * اَتھ کَتھہِ ہُنٛد خِیال تھوُن زِ جلوس روزِ صِرِف مَنظور شُدہ روٹ تہٕ مَقصدَس تام مَحدود۔ تَمام فِرقَن ہنٛدین مذہبی جذباتن تہٕ عقیدَن ہُنٛد پَزِ احترام کَرُن۔ * سَرکٲرِ تہٕ عوٲمی جائداد ہنٛز حِفاظت کَرُن تہٕ صَفٲیی ہُنٛد خِیال تھوُن۔ کٲنٛسہِ تہِ غٲر قانونی سرگرمی مَنٛز پَزِ نہِ حِصہٕ نؠوُن یا امن و امان ہُنٛد مَسلہٕ پَزِ نہِ پٮ۪دا کَرُن۔ * کانہہ تہِ اشتعال انگیز نعرہ پَزِ نہِ لَگاوُن، جذبٲتی تقریر پَزِ نہِ کَرنہِ ینہِ، یا کٲنٛسہِ تہِ اَتھ کِینٛہہ کامہِ مَنٛز پَزِ نہِ شٲمل گژھُن یَمہِ سٟتؠ مَذہبی جَذبات مَجروح گژھَن۔ ٹریفک یا پیدل پَکَن والٮ۪ن ہنٛدَس واتَس مَنٛز پَزِ نہِ کانہہ رُکاوَٹ پؠدا کَرنہِ ینہِ۔ * سَرکٲرِ یا عوٲمی جائدادَس پَزِ نہِ کانہہ نُقصان واتناوُن یا بَدشَکَل کَرُن۔ کانہہ تہِ اشتعال انگیز بینر، پوسٹر، پلے کارڈ، یا جھنڈا پَزِ نہِ ہاوُن۔ * قومی جھنڈس (National Flag) ہُنٛد پَزِ نہِ کانہہ اِحتِرام کَم کَرُن، تہٕ کٲنٛسہِ تہِ غٲر مُلکہِ، تَنظِیمِ یا جَمٲژ ہِنٛز پَزِ نہِ تَعرِیف کَرنہِ ینہِ۔ کٲنٛسہِ تہِ ٻێیِس مُلکہِ، تَنظِیمِ یا جَمٲژ ہِنٛدِ جَنڈَن یا نِشانَن ہُنٛد پَزِ نہِ مَظاہِرَہ کَرُن۔ کٲنٛسہِ تہِ اَتھ کِینٛہہ سَرگرمی مَنٛز پَزِ نہِ حِصہٕ نؠوُن یۄس مُلُک کِس اِتِحاد، خود مَختٲری تہٕ سالِمِیَت خٲطرہ نُقصان دہ آسِہ۔ایڈوائزری مَنٛز وۆنُہ آو زِ عوٲمی تعاوُن سٟتؠ یِیہِ محرم الحرام امن، عزت، اِحتِرام تہٕ ذمہ دٲری ہنٛدین اۆصولَن پؠٹھ پُر اَمن طریٖقہٕ سان مَناون۔