بارہمولہ ہَس منٛز گٔیہِ سیٚکھ کڑنَس دوران جہلم دٔریاوَس منٛز پیٚنہٕ سۭتۍ زٕ نَفر ہلاک۔

شُمٲلی کشمیر کِس بارمولا ضِلعَس منٛز رفیع آباد کِس داچن پورہ علاقَس منٛز گٔیہٕ بۄموارِ تہٕ بۄدوارِ درمِیان رٲژ سیکہِ کڑنَس دوران ناوِ پٮ۪ٹھٕ جہلم دٔریاوَس منٛز پیٚنہٕ سۭتۍ زٕ نَفر مارٕ۔

حکامَو ووٚن خبر رساں ایجنسی (کے این او) زِ دۄشوے ٲسۍ دٔریاوٕ منٛزٕ سیٚکہِ جمع کران ییٚلہِ تِم اچانک آبَس منٛز پیوٚے۔ تِہٕنٛز لاشہٕ روٗد پوٗرٕ رٲژ آبَس منٛز تہٕ بۄدوارِ دۄہ صُبحٲے آیہِ برآمد کرنہٕ۔

مرن والٮ۪ن ہٕنٛز شناخت چھِ جاوید احمد میر (28 وُہُر) تہٕ محمد انیس ملک (29 وُہُر) ناوٕ سۭتۍ کرنہٕ آمٕژ، یِم دۄشوَے داچن پورہٕکۍ روزَن وٲلۍ چھِ۔

أتھۍ دوران چھُ پولیسَن امہِ واقعہُک نوٹس دِیُت تہٕ کٔرٕکھ مٔزیٖد تفتیش شُروٗع۔