جموں کشمیرَس منٛز گرم بڑنٕچ پیشنگوئی، سرینگرَس منٛز ہیکہِ درجہٕ حرارت 35 ڈگری تام وٲتِتھ۔ یِنہٕ والٮ۪ن 24 گھنٹَن دوران چھُ جموں کشمیرَس منٛز کینٛژھن جایَن ہلکہٕ روٗد یا رُدٕ گرٛاے پیٚنُک اِمکان تہِ۔

اگست کِس ٲخرس منز خۄشٕک تہٕ گرم موسم آسنہٕ کِنۍ چھُ یِنہٕ والٮ۪ن کینٛژھن دۄہَن منٛز وادی کٔشیٖرِ منٛز درجہٕ حرارت ہُرنُک اِمکان۔ مٲدٲنی علاقَن منٛز ہیکہِ دُپہرَس گرمی ہُرِتھ تہٕ سرینگرَس منٛز ہیکہِ درجہٕ حرارت 35 ڈگری سیلسیس تام وٲتِتھ۔

محکمہٕ موسمیات سرینگر مرکز مُطٲبِق چھُ یِنہٕ والٮ۪ن 3 پٮ۪ٹھ 4 دۄہَن منٛز درجہٕ حرارتَس منٛز ہُریرُک اِمکان، یَتھ منٛز جُمعہ تہٕ بٹہٕ وارِ دۄہہٕ گرمی زیادٕہ آسہِ۔ اَتھ وقتَس دوران ہٮ۪کَو سرینگرَس سۭتۍ سۭتۍ وادی کٮ۪ن واریاہَن مٲدٲنی علاقَن منٛز زِیٛادٕ کھۄتہٕ زِیٛادٕ درجہٕ حرارت تقریباً 35 ڈگری سیلسیس یا اَمہِ نزدیٖک درجہٕ حرارت ریکارڈ کرنہٕ یِتھ تہٕ جموں کشمیرَس منٛزچُھ کینٛژھن جایَن ہلکہٕ روٗد یا رُدٕ گرٛاے پیٚنُک اِمکان تہِ ظٲہِر کرنہٕ آمُت۔