جموں و کشمیرَس منٛز چھُ برفٲنی جھیل پھٹنُک شٔدیٖد خطرٕ، 50 برفٲنی جیٖل چھِ آفتہٕ کِس دہانس پیٹھ ماہرینَن ہٕنٛز اتھ متعلق وارننگ۔

جموں و کشمیرَس منٛز چھِ گلیشیر پگلنُک تہٕ اچانک برفٲنی جھیلن پھٹنُک خطرٕ خطرناک سطحس تام بڑیمُت۔ جموں یوٗنیورسٹی ہٕنٛدِ ریموٹ سینسنگ شعبٕکۍ سربراہ پروفیسر اوتھر سنگھ جسروتیا سٕنٛزِ سربرٲہی منٛز چھِ أکِس حالیہ تحقیقی رپورٹہِ مُطٲبِق ریاستَس منٛز 55 انتہٲئی حساس جیٖلَن ہٕنٛز نشاندہی کٔرمٕژ، یِم کُنہِ تہِ وِزِ بٔڑ تبٲہی ہُنٛد سبب ہیٚکہِ بٔنِتھ۔ ہائی ریزولوشن سیٹلائٹ امیجری تہٕ گوگل ڈیٹا استعمال کٔرِتھ چھُ اَتھ مطالعَس منٛز وادی کٔشیٖرِ ہٕنٛدٮ۪ن 46 جیٖلن تہٕ جموں علاقَس منٛز 9 جیٖلن ریڈ زون (خطرناک زمرہٕ) پٲٹھۍ نقشہٕ بناونہٕ آمُت۔ مطالعہٕ منٛز آو اہم ہاٹ سپاٹس تہٕ جھیلن ہٕنٛز تیزی سان توسیع اجاگر کرنہٕ۔ 55 جھیلو منٛزٕ ٲسۍ 10 بٔڑۍ جھیل یِہنٛدِ بڑوُن سائز تہٕ اکھ أکِس سۭتۍ جُڑِتھ جھیلن ہٕنٛدِ نظامہٕ کِنۍ انتہٲیی خطرناک مانٛنہٕ یِوان۔