اونتی پور مُقابلَس منٛز اکھ نامعلوم ملی ٹنٹ مارٕ، آپریشن جٲری۔

جنوبی کشمیر کِس اونتی پورہ سب ڈسٹرکٹ کِس ترال علاقس منٛز سیکورٹی فورسز تہٕ ملی ٹنٹن درمیان جٲری مُقابلَس منٛز چھُ اکھ نامعلوم ملی ٹنٹ ہلاک گوٚمُت، کشمیر زون پولیسَن ووٚن ‘ایکس’ پٮ۪ٹھ أکِس پوسٹَس منٛز: ‘اونتی پورہ کِس نادر ترال علاقَس منٛز چھُ اکھ مُقابلہٕ شُروٗع گوٚمُت۔ تِمَو ووٚن: ‘پُلیٖس تہٕ حِفاظتی دستہٕ چھِ کٲم کران۔’ أکۍ پُلیٖس اَفسرَن دِژ اطلاع زِ ‘اَتھ مُقابلَس دوران آو اکھ نامعلوم ملی ٹنٹ مارنہٕ ییٚلہِ زن آپریشن وُنہِ تہِ جٲری چھُ۔’ فوجٕکۍ ترجُمانَن ووٚن زِ ‘انٹلیجنس ایجنسیَن ہٕنٛدِ تصدیٖق شُدٕ معلوٗماتَس پٮ۪ٹھ کٲم کٔرِتھ کٔر فوج، پولیس تہٕ سی آر پی ایفٕک ٹیمو 15 مئی اونتی پورہ کِس نادر ترال علاقَس گیرٕ بٔنٛدی کٔرِتھ تلاشی مہم شروع۔ تٔمۍ ووٚن: ‘اَتھ دوران آیہِ مشکوک حرکت وُچھنہٕ تہٕ چلینج کرنہٕ پتہٕ کٔرملی ٹنٹو اندھا دھند گولہِ چلٲوِتھ، ییٚمہِ کِس نٔتیٖجس منٛز مُختٔلِف جمٲژن درمیان جھڑپ گٔیہِ۔ تِمَو ووٚن زِ علاقَس منٛز چھِ آپریشن وُنہِ تہِ جٲری۔ یہِ چھُ قٲبلِ ذِکر زِ یہِ چھُ پٔتمہِ 48 گٲنٛٹَن منٛز جنوٗبی کٔشیٖرِ منٛز یہِ دۄیِم مُقابلہٕ۔