اونتی پورہس منٛز ڈرگ ڈیلر گِرِفتار۔ ممنوعہ مادہ آو برآمد کرنہ: پولیس

سماجس منٛز نشاور ادویاتُک ناسور ختم کرنٕچ مُہِم جٲری تھٲوِتھ کوٚر اونتی پورہ پولیسَن کھاریو علاقَس منٛز اکھ ڈرگ ڈیلر گِرِفتار تہٕ أمِس نِش کوٚرُکھ چرٕس ہیوٗ ممنوعہ مواد حٲصِل۔ پُلسہٕ کہِ ترجمانَن وون زِ کھاریو پُلیٖس تھانہٕ کہِ أکہِ ٹیٖمَن رٔٹِو لڈو بٹا پورہ کراسنگَس پٮ۪ٹھ اَکھ شَکاوَر شخٕص، ییٚمہِ پُلیٖس وُچِھتھ ژلنٕچ کوٗشِش کٔر۔ تٔمۍ ووٚن زِ تلٲشی دوران آو أمۍ سٕنٛدِس قبضَس منٛز 3.10 گرام چرٕس ہیوٗ مواد برآمد کرنہٕ، ییٚمہِ پتہٕ سُہ فوری طور موقعہٕ پٮ۪ٹھے گِرِفتار کرنہٕ۔ مُلزِم سٕنٛز شناخت چھِ تنویر احمد موچی، نیچو منظور احمد موچی سٕنٛدِ ناوٕ سٕتہِ کرنہٕ آمٕژ، یُس لڈوہُک روزَن وول چھُ۔ پُلسہٕ ترجمانَن ووٚن بیٚیہِ زِ این ڈی پی ایس ایکٹ کٮ۪ن مُتعلقہٕ دفعاتن تحت چھُ کھاریو پُلیٖس تھانس منٛز ایف آئی آر نمبر 78/2025 تحت مقدمہ درٕج کرنہٕ آمُت تہٕ مٔزیٖد تفتیش چھِ شُروٗع کرنہٕ آمٕژ۔ تٔمۍ ووٚن ووٚن زِ پُلیٖس چھِ منشیاتُک خطرٕ ختم کرنہٕ خٲطرٕ پرعزم ۔