انتظامیہ چھِ یَتھ ونٛدَس منٛز اہم مقامَن پٮ۪ٹھ وندٕ سیاحتس فروغ دِنہٕ خٲطرٕ تیاروندَس دوران لوٗکَن ہُنٛد آرام یقینی بناونہٕ خٲطرٕ چھِ تمام محکمہٕ گۄڈَے فعال کرنہٕ آمٕتۍ/ صوبائی کمشنر کشمیر

یَتھ ونٛدَس منٛز سیاحَن وادی یِنٕچ دعوت دِوان چھِ صوبائی کمشنر کشمیر انشول گرگَن وون زِ انتظامیہ چھِ ہموار عوٲمی خٔدمَتن یقینی بناونہٕ تہٕ اہم مقامَن پٮ۪ٹھ وندٕ سیاحتس فروغ دِنہٕ باپتھ پوٗرٕ پٲٹھۍ تیار۔ سی این آی مُطٲبِق لال چوک سرینگرَس منٛز مُنعقد أکِس تقریٖبَس دوران میڈیا نُمایندَن سۭتۍ کتھ باتھ کٔرِتھ ووٚن صوبائی کمشنر کشمیر انشول گرگَن زِ ونٛدٕ چھُنہٕ کٔشیٖرِ خٲطرٕ نٔو۔ تِم چھِ پرٛٮ۪تھ ؤرۍ یہِ یِوان، تہٕ پرٮ۪تھ گزرن وٲلِس موسمَس سۭتۍ چھِ انتظامیہ پنٕنۍ تیٲری بہتر بناوان۔ تٔمۍ ووٚن زِ چیف سیکرٹریَن چھِ ونٛدٕ چہِ تَیٲری مُتعلِق خصوٗصی ہِدایَت جٲری کٔرمٕژ، تہٕ صوبائی تہٕ ضِلعہٕ انتظامیہ چھِ باقٲعدٕگی سان زمینی انتظاماتُک جٲیزٕ نِوان۔ تٔمۍ ووٚن بیٚیہِ زِ ‘کنٹرول رومَو پٮ۪ٹھٕ شیٖن صاف کرنَس تہٕ باقٕے سٔہوٗلِیاتَن تام چھُ پرٛٮ۪تھ کانٛہہ چیٖز تفصیلی تہٕ منظم اندازَس منٛز ترتیب دِنہٕ آمُت’۔