ریاستُک درجہ بحال کرنہٕ خٲطرٕ چھُنہٕ بی جے پی یَس سۭتۍ اتھہٕ رَلاونُک کانٛہہ سوالےٕ: عمر عبداللہ

جموں و کشمیرٕکۍ وزیر اعلیٰ عمر عبداللہ ہَن کٔر بَٹہٕ وارِ دۄہ واضح زِ تٔمۍ سٕنٛز پارٹی کرِ نہٕ ریاستُک درجہ بحال کرنہٕ خٲطرٕ بی جے پی یَس سۭتۍ کانٛہہ تہِ اتحاد۔ تٔمۍ ووٚن زِ نیشنل کانفرنسُک چھُنہٕ ماضی چہِ غلطیہِ دہراونُک کانٛہہ اِرادٕ۔ سرینگرَس منٛز أکِس پریس کانفرنسَس منٛز تقریر کٔرِتھ ووٚن عمر عبداللہ ہَن زِ ‘اگر جموں و کشمیر صرف تمہِ ساتہٕ ریاستُک درجہٕ حٲصِل کٔرِتھ ییٚلہِ بی جے پی یَتہِ اقتدارَس منٛز یِیہِ، تیٚلہِ پزِ بی جے پی یَس یہِ واضح پٲٹھۍ عوامس تام واتناوُن۔’ تٔمۍ ووٚن بیٚیہِ زِ بی جے پیَن چھُنہٕ زانہہ پننِس منشور، پارلیمنٹ، یا سپریم کورٹَس منٛز یہِ دعویٰ کوٚرمُت زِ ریاستُک درجہٕ بحال کرُن چھُ بی جے پی ہٕنٛدِس اقتدارس منٛز آسنَس پٮ۪ٹھ مشروط۔ أمۍ سٕنٛدِ مُطٲبِق اگر یہِ کتھ چھِ، تیٚلہِ پَزِ بی جے پی ایماندٲری سان یہِ اطلاع دِنۍ زِ یوٚتام جموں و کشمیرَس منٛز غٲر بی جے پی حکومت روزِ، توٚتام یِیہِ نہٕ ریاستُک درجہٕ بحال کرنہٕ۔ اَمہِ پتہٕ بِہِو أسۍ عوامس سۭتۍ تہٕ فٲصلہٕ کٔرِو زِ کُس قدم چھُ تُلُن۔ نیشنل کانفرنسٕکۍ نٲیِب صدرَن ووٚن صاف زِ ‘بی جے پی یَس سۭتۍ چھُنہٕ کُنہِ قٕسمُک اِتحاد کرنُک سوالٕے وۅتھان۔