نگروٹہ ضمنی چُناو : ؤزیٖرِ اعلیٰ عمر عبداللہ ہَن کٔر لُکن نیشنل کانفرنس امیدوارَس ووٹ دِنٕچ اپیل۔

جموں و کشمیر وزیر اعلیٰ تہٕ نیشنل کانفرنسٕک (این سی) نٲیِب صدٕر عمر عبداللہَن کٔر برٛسوارِ دۄہ نگروٹہ اسمبلی حلقَس منٛز أکِس اِنتِخابی جلسَس خٕطاب کٔرِتھ عوامس اپیل زِ تِم کٔرِنۍ 11 نومبر سپدن وٲلِس ضمنی چُناوس منٛز نیشنل کانفرنس وۄمیدوار شمیم بیگمہِ بٔڑِس تعدادَس منٛز ووٹ ۔
عمر عبداللہ ہَن ووٚن زِ نیشنل کانفرنسَن چھُ ہمیشہٕ لوٗکَن ہٕنٛدٮ۪ن مفادَن ترجیح دِژمٕژ تہٕ چھُکھ ریاستہٕ کِس پرٮ۪تھ علاقٕچ متوازن ترقی باپتھ کوٗشش کٔرمٕژ۔ تٔمۍ ووٚن زِ عوامس پَزِ بیٚیہِ اکہِ لٹہِ این سی یَس پٮ۪ٹھ پَنُن بھروسہٕ تھاوُن یُتھ حکومتی ترقیاتی منصوبہٕ ہیکَن بغٲر کُنہِ رکاوٹہٕ جٲری تھٲونہٕ یِتھ۔
تٔمۍ ووٚن، ‘یہِ اِلیکشن چھُنہٕ صرف أکِس نشستہٕ خٲطرٕ بلکہِ أکہِ عہدٕ خٲطرٕ – اکھ وعدٕ یتھ منٛز أسۍ جموں و کشمیرس امن، ترقی تہٕ خۄشحٲلی ہٕنٛزِ نَیہِ وتہِ پٮ۪ٹھ نِنُک مقصد چھُ۔’وزیر اعلیٰ ہن دِیُت عوامس زور زِ تِم کٔرِن پنُن فٲصلہٕ ترقی تہٕ استحکامکِس حقس منٛز، مذہب، علاقٲیی تعصب یا بیٚیہِ کُنہِ سیٲسی دباو ترٲوِتھ۔