محبوبہ مفتی سُند وزیر اعلیٰ ہس پیٹھ طنز: "عوامس وَن کۭتیاہ وعدٕ گٔے پورٕ”

پیپلز ڈیموکریٹک پارٹی (پی ڈی پی) صدر تہٕ سٲبقہٕ وزیر اعلیٰ محبوبہ مفتی یَن ووٚن زِ پرٮ۪تھ معاملَس منٛز چُھ پی ڈی پی یَس تنقید کرنہٕ بجایہِ پَزِ وزیر اعلیٰ عمر عبداللہ ہس عوامس وضاحت کرٕنۍ زِ أمۍ کۭتیاہ وعدٕ چھِ پوٗرٕ کٔرمٕتۍ تہٕ أمۍ کۭتیاہ مسلہٕ کٔرۍ حل ۔
محبوبہ مفتی ٲس ژٔندٕروارِ دۄہ جموَس منٛز أکِس پریس کانفرنسَس خٕطاب کَران۔ تٔمۍ ووٚن زِ ‘عمر عبداللہ چھُ حکمرانی پٮ۪ٹھ توجہ دِنہٕ بدلہٕ ہمیشہٕ پی ڈی پییُک ذِکر کران وُچھنہٕ آمُت۔ پٔتمہِ لوک سبھایہِ تہٕ اسمبلی چُناوس دوران اوس تٔمِس یۅہے طٔریٖقہٕ۔’
تٔمۍ ووٚن بیٚیہِ زِ وزیر اعلیٰ ہس پَزِ روزگار، افراط زر تہٕ بُنیٲدی سٔہوٗلِیاتَن ہٕنٛدِ لحاظٕ پننہِ حکوٗمتٕچ کارکردٕگی ہُنٛد حساب عوامس برٛونٛہہ کَنۍ پیش کرُن۔
اَتھ موقعَس پٮ۪ٹھ کٔر محبوبہ مفتی یَن ‘سمارٹ میٹرز’ کِس معاملَس پٮ۪ٹھ حکوٗمتَس پٮ۪ٹھ سٮ۪ٹھاہ تنقید۔ تٔمۍ ووٚن زِ ‘عمر عبداللہ اوس پتھ کالہِ میٹرن ہنز مخالفت کران،وۅنۍ کیازِ چُھ ونان لٲگِو۔’