جوٚمَس منٛز أکِس زنانہِ سان 3 ڈرگ ڈِیلَر گِرِفتار، ہیروئِن ہیوٗ مادٕ برآمد : پُلیٖس
منشیاتَن خٕلاف جٲری کریک ڈاوُنَس منٛز کٔرۍ جموں پولیسَن أکِس زنانہٕ سان ترٛےٚ منشیات فروش گِرِفتار تہٕ یِمَن نِش کوٚرُکھ ہیروئِن ہیوٗ مادٕ تہٕ زٕ تیز ہتھیار برآمد ۔
پُلسہٕ ترجمانَن ووٚن أکِس بیانَس منٛز زِ آر ایس پوٗرہ پولیس تھانٕکۍ أکۍ ٹیٖمَن رُکٲوۍ معموٗلِ گشتَس دوران دلجیت چوک، آر ایس پورہَس نزدیٖک نمبر T1224DL0672D تحت درٕج اکھ شَکاوَر گٲڑۍ ۔
تٔمۍ ووٚن زِ پولیس وُچھِتھ کٔر گاڑِ منٛز سوارو ژلنٕچ کوٗشش، مگر الرٹ افسرَو رُکٲو کار تہٕ ترٛیٚشوے نفر رُکٲوِکھ موقعس پٮ۪ٹھ۔
بیانَس مُطٲبِق چھُ مُلزِمَو پنٕنۍ شناخت پِریتم سنگھ عرف سیٹھی ناوٕ سۭتۍ کٔرمٕژ، یُس جردا رام گڑھُک روزَن وول موہن سنگھ سُنٛد نیٚچُو چُھ۔ نارائن شرما عرف سونا، برتا لال شرما سُنٛد نیٚچُو، یُس وجے پوٗر وارڈ نمبر 1، سامبا ضِلعُک روزَن وول چھُ۔ تہٕ جسپریت کور عرف پریتی یۅسہٕ وجے نگر سامبا کِس روزَن وٲلِس نارائن سنگھ سٕنٛز خانٛدارِنۍ چھےٚ۔
ترجمانَن ووٚن زِ تلٲشی دوران آو نارائن شرماہس نِش 6.92 گرٛام، پریٖتم سِنٛگھس نِش 7.12 گرٛام ہیروئِن ہیوٗ مادٕ حٲصِل کرنہٕ۔