جوٚمَس منٛز گۄڈٕنِچہِ بین الاقوٲمی میراتھنُک شاندار آغاز، وزیر اعلیٰ ہَن دِژ دورُک آغاز۔ اداکار مِلِند سومنَن کٔر پننہِ خانٛدارِنہِ انکِتا کونورَس سۭتۍ میراتھنَس منٛز حصہٕ، ییٚلہِ زَن اداکارہ گُل پناگَن کٔر افتتٲحی تقریٖبہِ منٛز شِرکَت کَرن والٮ۪ن ہٕنٛز حوصلہٕ اَفزٲیی۔

جموں و کشمیرٕکۍ وزیر اعلیٰ عمر عبداللہ ہَن کوٚر آز مولانا آزاد سٹیڈیم پٮ۪ٹھٕ جموں میراتھنُک جھنڈٕ دِنہٕ۔ اَتھ موقعس پیٹھ کٔر بٔڑِس تعدادس منٛز نوجوان، کھلٲڑۍ تہٕ فٹنس شوقیٖنَو سٮ۪ٹھاہ جوشہٕ سان شرکت۔ لگاتار روٗد آسنہٕ باوجوٗد تہِ نیوٗ ساسہٕ بٔدۍ پرجوش دورن والٮ۪و جموں کِس گۄڈنِکِس بین الاقوٲمی میراتھنَس منٛز حصہٕ۔ امہِ تقریبہِ ہُنٛد آغاز کوٚر وزیر اعلیٰ عمر عبداللہَن ، یٔمۍ شِرکت کَرن والٮ۪ن سۭتۍ دورَس منٛز تہِ حصہٕ نِیو۔ میراتھن گٔیہِ مولانا آزاد سٹیڈیم پٮ۪ٹھٕ آفتاب کھسنہٕ وِزِ شروع تہٕ اَتھ منٛز ٲسۍ ترٛٮ۪ن ضٗمرَن منٛز مُقابلہٕ شٲمِل: 21 کِلومیٖٹر ہاف میراتھن، 10 کِلومیٖٹر فٹنس دور، تہٕ 5 کِلومیٖٹر تفریحی دور۔ نٲظمَن مُطٲبِق یِیہِ کُل 1.33 کرور رۄپیہِ انعام زینَن والٮ۪ن منٛز بٲگراونہٕ۔