عمر عبداللہ، روح اللہ کٔر گندربل مُقابلہٕ کِس تحقیقاتُک مُطالبہٕ فوجن مور گندر بل کارروائی منٛز اکھ دہشت گرد، تاہم متوفی سٕنٛد عیالہ مُطٲبِق اوس نہٕ أمِس دہشت گردی سۭتۍ کانٛہہ واستہٕ۔

فوجَن وسطی کشمیر کِس گندر بل ضِلعس منٛز أکِس مُبیعنہٕ مُقابلَس منٛز اکھ دہشت گرد مارنُک داعوا کرنہٕ پتہٕ اکہِ دۄہہ پتہٕ، جموں و کشمیرٕکۍ وزیر اعلیٰ عمر عبداللہ تہٕ ممبر پارلیمینٹ آغا روح اللہ مہدی یَن کٔر واقعہٕ کِس تحقیٖقاتٕچ منٛگ۔ حالانٛکہِ دۄشوٕے رہنُماوَو کوٚر نہٕ اَتھ پٮ۪ٹھ ‘جعلی مُقابلہٕ’ آسنُک اِلزام، مگر تِمو کوٚر متوفی سٕنٛدِس عیال سٕنٛدِ بیانُک حوالہٕ دِتھ فوری تفتیشُک مُطالبہٕ۔ دۄشوٕنی رہنُماہن ہُنٛد یہِ مُطالبہٕ چھُ تَمہِ وِزِ آمُت ییٚلہِ میڈیا رپورٹو متوفی سٕنٛدِس عیالَس ہُنٛد حوالہٕ دِتھ دعوا کوٚرمُت زِ سُہ اوس بےٚ گناہ تہٕ أمِس چھُنہٕ دہشت گردی سۭتۍ کانٛہہ وابستہٕ۔ کٔشیٖرِ منٛز تٔعینات ہِنٛدُستٲنہِ فوجٕکہِ چِنار کورپسَن ووٚن برٛسوارِ دۄہ زِ أمہِ اوس گندر بل کِس ارہاما علاقَس منٛز أکِس کاروٲیی دوران اکھ دہشت گرد ہلاک کوٚرمُت۔ فوجَس مُطٲبِق: ’31 مارٕچ 2026 چہِ رٲژ ہِنٛدِ وقفہٕ سان گولہِ چلاونَس دوران آیہِ محاصرٕچ حکمت عملی نَیہِ سرٕ منظم کرنہٕ’۔