سپریم کورٹَن دِژ تامِل ناڈوُکِس سٲبق ؤزیٖر وی سینتھل بالاجیس ضمانت۔
سپریم کورٹَن دِژ برٛسوارِ دۄہ تامِل ناڈوُک سٲبقہٕ وزیر وی سینتھل بالاجی یَس ٹرانسپورٹ محکَمس منٛز مُلٲزِمن ہِنٛدِس مُقررَس منٛز مبینہ بے قاعدگیَن سۭتۍ متعلق منی لانڈرنگ کِس معاملَس منٛز مشروط ضمانت۔
جسٹس ابھے ایس اوکا تہٕ جسٹس آگسٹین جارج مسیح سٕنٛدِ بیٚنچ دِژ انفورسمنٹ ڈائریکٹوریٹ (ای ڈی) تہٕ عرضی گزار سٕنٛدۍ دلیلہٕ تفصیل سان بوزنہٕ پتہٕ سٲبقہٕ وزیر سٕنٛز ضمانتٕچ عرضی اجازت۔
12 اگست اوس سپریم کورٹَن اتھ معاملَس منٛز پنُن فٲصلہٕ محفوظ کوٚرمُت۔
بیٚنچن دِژ بالاجی سٕنٛزِ عرضی منظوٗری یتھ منٛز مُقدِمہٕ شُروٗع گَژھنس منٛز دیری اَکہِ بُنیادس پیٚٹھ غور کرنہٕ یِیہِ۔
28 فروری اوس مدراس ہائی کورٹ تہٕ امہِ برٛونٛہہ سیشن کورٹَن بالاجی سٕنٛز ضمانتٕچ عرضی رَد کٔرمٕژ۔ تٔمۍ کوٚر ہائی کورٹ کہِ طرفہٕ راحت نِش اِنکار کرنہٕ پتہٕ اعلیٰ عدالتَس سۭتۍ رٲبطہٕ۔
بالاجی، اکھ دراوڑ مُنیترا کڑگم (ڈی ایم کے) رہنُما، آو ای ڈی یَن 14 جون 2023 منی لانڈرنگ کِس معاملَس منٛز گرفتار کوٚرمُت