لیفٹیننٹ گورنرَن  لٔہروو 80 مہِ یومہِ آزٲدی دۅہ کِس موقعس پٮ۪ٹھ لوک بھونس منٛز قومی جھنڈٕ۔ لیفٹیننٹ گورنرَن کٔر آزٲدی خٲطرٕ سخت سفر، جدوجہد تہٕ قربٲنِین ہُند اِظہار۔ تٔمۍ کوٚر تِم شہری تہِ یاد یِم ییٚمہِ ؤر یہِ قدرتی آفتن منٛز افسوسناک پٲٹھۍ موٗدۍ۔ 

بہٕ چُھس سارنٕے شہرِین سٍتۍ شٲمِل پننین بٲنی مٲلٮ۪ن تہٕ مادر ہِندوستان کیٚن بہادر نیٚچوٮ۪ن تہٕ کورٮ۪ن دِلہٕ خراج تحسین پیش کَران۔ایل جی ین ووٚن تقریٖبہِ خطاب کران زِ اسہِ چھےٚ پُر امن، خۅشحال جموں و کشمیر تہٕ اکھ مضبوٗط مُلُک تعمیر کرنہٕ خٲطرٕ  یِکہٕ وٹہٕ کٲم کرٕنۍ تہٕ پننین شہیدَن تہٕ آزٲدی پسندن عزت دِنُک بہتٔریٖن طٔریٖقہٕ چھُ ایماندارانہٕ کٲم کرنُک عزم ک تہٕ اسہِ حٲصِل کٔرمٕژ قٍمتی آزٲدی ہٕنٛز حفاظت کرنُک عزم۔لیفٹیننٹ گورنرَن کوٚر ہِندوستان کِس عالمی رہنُما بننہٕ کِس صلٲحیتَس پٮ۪ٹھ سٮ۪ٹھاہ اعتمادُک اِظہار تہٕ  دِتُکھ زور زِ شہرِین چھُ اکھ شمولیتی معاشرٕ بناونہٕ خٲطرٕ اِکہٕ وٹہٕ یِنٕچ ضروٗرت یُس پرٛٮ۪تھ کٲنٛسہِ ہُنٛد خیال تھاوان آسہِ تہٕ ہمدردی ظٲہِر کرِ۔