جموں و کشمیر اسمبلی خصوصی حیثیت کِس قراردادَس پٮ۪ٹھ ہنگامہٕ پتہٕ دۄہَس خٲطرٕ مُلتوی۔

جموں و کشمیر قانون ساز اسمبلی آیہِ برٛسوارِ دۄہ صبحٲے تام مُلتوی کرنہٕ ییٚلہِ بی جے پی ارکانو خصوصی درجہٕ بحال کرنٕچ قراردادَس خٕلاف ہنگامہ کوٚر۔ سپیکرَن دِیُت ایوانس منٛز بی جے پی ارکانَن ہٕنٛدِ ہنگامہٕ وِزِ ایوان دۄہَس خٲطرٕ ملتوی کرنُک حکم۔
سپیکر عبدالرحیم راتھر سٕنٛدِس ہِدایتَس پٮ۪ٹھ آیہِ کم از کم ترٛےٚ بی جے پی رُکُن کڑنہٕ، مگر حزب اِختلافٕکۍ ارکانَن ہٕنٛدِ مُخٲلِفَت کہِ وجہ سۭتۍ گوٚو ایوانس منٛز ہنگامہٕ۔ برٛسوارِ دۄہ صُبحٲے ییٚلہِ ایوانن ہِنٛز کاروٲیی شُروٗع گٔیہِ، بی جے پی رُکنو کوٚر احتِجاج شُروٗع۔ بی جے پی ایم ایل اے تہٕ قائد حزب اختلاف سنیل شرما اوس قراردادَس پٮ۪ٹھ کتھ کران ییٚلہِ عوامی اتحاد پارٹی ہُنٛد رہنُما تہٕ ایم ایل اے لنگیٹ شیخ خورشیدَن وۄٹھ دِژ تہٕ تُلُن اکھ بینر یَتھ منٛز وننہٕ اوس آمُت زِ آرٹیکل 370 تہٕ 35 اے گژھہِ بحال کرنہٕ یُن۔