پوٗنچھس منٛز ایٚل او سی یَس پٮ۪ٹھ زٕ دراندازٕ ہلاک، آپریشن چھُ جٲری۔

جموں و کشمیر کِس پُنچھ ضِلعس منٛز لائن آف کنٹرول (ایل او سی) پٮ۪ٹھ دراندازی ہٕنٛز کوٗشِش ناکام بناونہٕ سۭتۍ گٔیہِ فوجَن زٕ درانداز۔
فوجٕچ وائٹ نائٹ کورَن ووٚن جُمعہ دۄہ صُبحٲے ‘ایکس’ پٮ۪ٹھ أکِس پوسٹَس منٛز زِ "پُنچھ سیکٹرَس منٛز لائن آف کنٹرولَس سۭتۍ آیہِ راتھ رٲژ دہشت گردَن ہٕنٛز نقل و حرکت وُچھنہٕ”۔
تٔمۍ ووٚن زِ تَتہِ تعینات چوکس فوجَو رُکٲوۍ دراندازی کرَن وٲلۍ ملی ٹنٹ ییٚمہِ کِس نٔتیٖجس منٛز دۄشوٕنی فریقَن درمیان سٮ۪ٹھا گولہٕ باری گٔیہِ۔
پوسٹَس منٛز ووٚن زِ آپریشن روٗد پوٗرٕ رٲژ جٲری، ییٚمہِ کِس نٔتیٖجس منٛز زٕ ملی ٹنٹ ہلاک گٔیہِ۔
پوسٹَس منٛز ووٚن بیٚیہِ زِ علاقَس منٛز تلٲشی کِس نٔتیٖجَس منٛز آیہِ بٔڑِس تعدادَس منٛز ہتھیار تہٕ گولہٕ بارود برآمد کرنہٕ۔
علاقَس منٛز چھِ وُنہِ تہِ آپریشن جٲری۔