عمر عبداللہن چھُ ایشیاہُک ساروِی کھۄتہٕ بوٚڈ باغ "باغِ گل لالہ” لُکن تہٕ سٲلانٮ۪ن خٲطرٕ کھوٗلمُت۔

گُل لالہ، شہر آفاق جھیل دل کِس بٔٹِھس پٮ۪ٹھ تہٕ سرینگر کِس زبرون پہاڑن ہٕنٛدِس دامنس پٮ۪ٹھ ایشیاہُک ساروِی کھۄتہٕ بوٚڑ باغ، آو بۄدوارِ دۄہ سیاحن تہٕ عوامس خٲطرٕ کھولنہٕ ییٚلہِ وزیر اعلیٰ عمر عبداللہ روٲیتی لباسَس منٛز ‘فیران’ لٲگِتھ دیہی ترقی تہٕ پنچایت وزیر جاوید احمد ڈار، ناصر اسلم وانی، ایم ایل اے تنویر صادق، احسان پردیشی کمشنر کشمیرُک دورٕ کوٚر۔ وی کے بِدھوری، ڈِسٹرکٹ مجسٹریٹ سرینگر بلال محی الدین تہٕ باقٕے بٔڑِس حُکامن ہِنٛزِ موجوٗدگی منٛز گوٚو باغُک افتتاح ۔
وزیر اعلیٰ یَن کوٚر پتہٕ باغُک معٲینہٕ تہٕ کٔرٕن تتہِ موجود غٲر مقٲمی سیاحَن سۭتۍ کَتھ باتھ۔
مقٲمی تہٕ غٲر مقٲمی سیاحن ہُنٛد ہجوم اوس گۄڈَے باغس نٮ۪برٕ کنہِ جمع گوٚمُت، یِم باغٕک شاندار نظارن ہُنٛد لُطُف تُلنہٕ خٲطرٕ بے تاب ٲسۍ۔
مُلکہٕ کٮ۪و مُختٔلِف حِصو پٮ۪ٹھٕ یِنہٕ وٲلۍ سیاحَن منٛز اوس سٮ۪ٹھاہ جوش تہٕ تِم ٲسۍ خوبصوٗرتی تہٕ خوٗبصوٗرتی خٲطرٕ کٔشیٖرِ ہٕنٛدٮ۪ن تمام سیاحتی مقامَن ہٕنٛز تعریٖف کران۔