امرناتھ یاترا: زمین، ہوا تہٕ ٹیکنالوجی پٮ۪ٹھ مبنی سہ رخی سیکورٹی انتظامات

سالانہٕ امرناتھ یاترا چھِ آز سرکٲرۍ پٲٹھۍ شروٗع گٔمٕژ، گۄڈٕنیُک قافلہ چھُ سخت حفاظتی اقداماتن درمیان جمہِ پٮ۪ٹھٕ سرینگر کُن روانہٕ گوٚمُت۔ حِفٲظتی نِظام چُھ زِیارَن ہِنٛز حِفاظتہٕ یقینی بناونہٕ خٲطرٕ سہ رخی بُنیادس پیٚٹھ قٲیِم کرنہٕ آمُت، یَتھ منٛز یاترا وتن پٮ۪ٹھ پرٛٮ۪تھ کوٗنَس پٮ۪ٹھ حِفاظتی دستہٕ تعیِنات کرنہٕ آمٕتۍ چھِ ۔ اہلِکارو مُطٲبِق چھِ پہلگام تہٕ بالتالَس أنٛدِ پٔکۍ علاقَن منٛز حِفاظتٕکہِ غٲر معموٗلی اِنتِظام کرنہٕ آمٕتہِ ۔ یاترا دوران کُنہِ تہِ ناخوشگوار واقعہٕ رُکاونہٕ خٲطرٕ چھِ پوٗرٕ وتہِ پٮ۪ٹھ پولیس، سی آر پی ایف، تہٕ باقی نیم فوجی دستن ہٕنٛز سٮ۪ٹھاہ موٗجوٗدگی تعینات کرنہٕ آمٕژ۔ ذٔرٲیعو چھےٚ اطلاع دِژمٕژ زِ سیکورٹی چھِ سہ رخی بنیادس پٮ۪ٹھ ترتیب دِنہٕ آمٕژ، یَتھ منٛز زمینی نگرٲنی خٲطرٕ سیکورٹی فورسٕچ تعینٲتی، فضائی نگرٲنی خٲطرٕ ڈرونن ہُنٛد استعمال، تہٕ اَہَم مقامَن پٮ۪ٹھ سی سی ٹی وی کیمرَو ذٔریعہٕ 24/7 نگرٲنی شٲمِل چھےٚ۔ یہِ چھُ قٲبلِ ذِکر زِ پہلگامَس منٛز حالٕے ملی ٹنٹ حملٕچ روشنی منٛز چھِ سیکیورٹی ایجنسیَو ییٚمہِ لٹہِ علاوٕ سخٕت اقدامات نافذ کٔرمٕتۍ۔