*این سی کِس قیادتس منز چھِ مُقٲمی خۅد حکوٗمتُک سارِوٕے کھۄتہٕ بوٚڈ دُشمن، یُس زٲنِتھ مٲنِتھ اِنتِخابَن منٛز ژیر کان چھے: بی جے پی ایم ایل اے پٹھانیا*

بھارتیہ جنتا پارٹی (بی جے پی) ہٕکۍ اُدھم پوٗر مشرقٕک ایم ایل اے، رنبیر سنگھ پٹھانیاہَن کوٚر جُمعہ دۄہ عمر عبداللہ سٕنٛدِس قیادتس منٛز حکوٗمتَس پٮ۪ٹھ زٲنِتھ مٲنِتھ پنچایت تہٕ اربن لوکل باڈی ہٕنٛدِس اِنتِخابس منٛز ژیر کرنُک اِلزام، تہٕ دِیُتُن این سی تہٕ کانگریسَس جموں و کشمیرَس منٛز "مُقٲمی خۄد حکوٗمتٕکۍ سارِوٕے کھۄتہٕ بٔڑ دُشمن” قرار۔پرژار وسیلن سۭتۍ کتھ باتھ کٔرِتھ ووٚن پٹھانِیاہَن زِ جموں و کشمیرَس چھِ مضبوٗط مقٲمی خۄد حکوٗمتٕچ ضرورت۔مُقٲمی اِنتِخابَن منٛز ژیر گژھنَس پٮ۪ٹھ کانگریس تہٕ نیشنل کانفرنسَس پٮ۪ٹھ تنقید کٔرِتھ ووٚن تٔمۍ زِ دۄشوٕنی جماعتَن چھِ پنٕنۍ موقفٕچ وضاحت کرنٕچ ضرورت۔ "اَز کوٚر لداخَن پنِنہِ مُقٲمی اِنتِخابَن ہُنٛد اعلان۔ جموں و کشمیر کیا چُھ رُکاوان؟ رُکاوٹ کیا چھِ؟” تٔمۍ پرژھ۔