شری امرناتھ یاترا: منوج سنہاہن کوٚر زائرینن ہُنٛد گۄڈنیُک قٲفلہٕ جھنٛڈٕ ہٲوِتھ روانہٕ

جموں و کشمیرُک لیفٹیننٹ گورنر منوج سنہاہن کوٚر بۄدوارِ دۄہ صُبحٲے سخت سیکورٹی اِنتِظامَن درمیان بھگوتی نگر بیس کیمپٕ پٮ۪ٹھٕ شری امرناتھ جی یاترا خٲطرٕ زائرین ہُنٛد گۄڈٕنیُک قٲفلہٕ روانہٕ۔ اَتھ موقعَس پٮ۪ٹھ ٲسۍ شرائن بورڈ، سول تہٕ پولیسٕکۍ بٔڑۍ اہلکار تہِ موٗجوٗد۔ حکامَو ووٚن زِ بۄدوارِ دۄہ صُبحٲے گٔیہِ کُل 5,892 زائرین 310 لۄکٹٮ۪ن تہٕ بٔڑٮ۪ن گاڑٮ۪ن منٛز کٔشیٖرِ کُن روانہٕ۔ تِمو کوٚر ذِکِر زِ یِمو منٛزٕ چھِ 2,489 پہلگام کُن گٔمٕتۍ ییٚلہِ زن 3,403 زائرین نُنوان گژھان آسن ۔ یہِ چھُ قٲبلِ ذِکِر زِ 38 دۄہَن پٮ۪ٹھ محیط سالانہٕ امرناتھ یاترا چھےٚ وادی کشمیر چن دۄشوٕنی رٮ۪وٲیتی وتن پہلگام (48 کِلومیٖٹر) تہٕ بالتال (14 کِلومیٖٹر) پٮ۪ٹھٕ اَکی وِزِ شُروٗع گٔمٕژ۔ یاترا شروٗع کرنہٕ برٛونٛہہ کٔر منوج سنہاہن جموں یاتری نِواس بیس کیمپس منٛز پوٗزا۔ تٔمۍ ووٚن: ‘جموں و کشمیر انتظامیہ، شری امرناتھ شرائن بورڈ، تہٕ جموں و کشمیرٕک بسکیٖنو چھِ پنٕنۍ ذمہٕ دٲری اصل پٲٹھۍ پوٗرٕ کٔرمٕژ۔ امرناتھ یاترا خٲطرٕ یِنہٕ وٲلۍ زائرین خٲطرٕ چھِ 2022 پٮ۪ٹھٕ سہولیت بہتر بناونہٕ آمٕژ۔