بڈگام ضمنی چُناو: پی ڈی پی امیدوارآغا منتظر مہدیس ضٲبطہ اخلاقٕچ خلاف ورزی ہُنٛد نوٹس جٲری

جموں و کشمیر کِس بڈگام ضِلعس منٛز ضمنی چُناوس دوران آو پیپلز ڈیموکریٹک پارٹی (پی ڈی پی) امیدوار آغا سید منتظر مہدی یَس ماڈل ضابطہ اخلاقٕچ مبینہٕ خلاف ورزی پٮ۪ٹھ نوٹس دِنہٕ۔ حکامَو مُطٲبِق چھُ امیدوارَس پٮ۪ٹھ اِجازتہٕ ورٲے ژیٖرۍ رٲژ سیٲسی جلسہٕ کرنُک الزام لگاونہٕ آمُت۔ ماڈل کوڈ آف کنڈکٹ چُھ نوڈل افسر سٕنٛدِ طرفہٕ جٲری کَرنہٕ آمُت۔ نوٹسَس منٛز اوسُکھ ونٛنہٕ آمُت زِ 1 تہٕ 3 نومبر آغا منتظرن کٔر بڈگام حلقہٕ کٮ۪ن مُختلِف علاقَن منٛز اِنتِخابی ریلیہٕ تہٕ جلوسَن ہُنٛد اِنتِظام تہٕ یِمَن واقعاتَن ہٕنٛدۍ ویڈیو گٔیہِ سوشل میڈیاہَس پٮ۪ٹھ وائرل۔ نوٹسَس مُطٲبِق چھِ گۄڈٕنِچہِ نظرِ منٛز سوشل میڈیاہَس پٮ۪ٹھ گَژھن وٲلۍ ویٖڈیو ضابطہٕ اخلاقٕچ خٕلاف ورزی ہُنٛد اِشارٕ کران۔ اِنتخٲبی حکامَو چھِ پی ڈی پی امیدوارَس ہدایت دِژمٕژ زِ سُہ کرِ 24 گھنٹَن انٛدر تحریری وضاحت جمع کرنہٕ زِ تٔمِس خٕلاف کیازِ گژھِ نہٕ کاروٲیی ۔ نوٹسَس منٛز اوس بیٚیہِ اکھ وارننگ تہِ شٲمِل۔