ڈاکٹر فاروق عبداللہ تہٕ عمر عبداللہ سٕنٛدِ طرفہٕ شری گرو نانک دیو جی سٕنٛدِس زایہِ دۄہس پیٹھ سِکھ باین مُبارکباد

جموں و کشمیر نیشنل کانفرنسُک صدر تہٕ سٲبقہٕ ؤزیٖر اعلیٰ ڈاکٹر فاروق عبداللہَن کٔر شری گرو نانک دیو مہاراج سٕنٛدِس 556 ہِمِس زایہِ دۄہہ کِس موقعس پٮ۪ٹھ سِکھ برادٔری دِلی مبارکباد تہٕ نیک خواہشات پیش۔ وزیر اعلیٰ عمر عبداللہ ہَن ووٚن پننِس پیغامَس منٛز یہِ تہِ زِ گُروٗ نانک جی سٕنٛز تعلیمہٕ چھِ انسانیت، عدم تشدد، روادٲری تہٕ بھائی چارٕکۍ قۭمتی سبق فراہم کران، یِم أزِکِس دورَس منٛز تہِ امن تہٕ ہشرٕچ روشنی ہٕنٛز کٲم چھِ کران۔ ڈاکٹر فاروق عبداللہ ہَن ووٚن پننِس پیغامَس منٛز، ‘گرو نانک جی سُنٛد انسانیتٕچ بہبود، برابری تہٕ باہمی احترامَس مُتعلِق پیغام چھُ پرٮ۪تھ مذہبہٕ تہٕ برادری خٲطرٕ ہِشی اہمیت تھاوان۔ اسہِ پَزِ اکھ پُر امن، روادار تہٕ اِکہٕ وٹہٕ معاشرٕ قٲیِم کرنہٕ خٲطرٕ پنِنہِ دۄہ دِش چہِ زِنٛدگی منٛز تٔمۍ سٕنٛدِ اصوٗل اپناوٕنۍ۔’ تٔمۍ ووٚن بیٚیہِ زِ جموں و کشمیرُک گنگا جمونی ثقافت چھےٚ امہِ کَتھِ ہٕنٛز علامت زِ یَتہِ کٮ۪و لوٗکو چھِ صدیو پٮ۪ٹھٕ اکھ أکِس سٕنٛزِ خوشی تہٕ امنس منٛز شریک رودمٕتۍ تہٕ یہِ زِ فرقہ وارانہٕ ہِشر چُھ امہِ علاقٕچ اصلی شناخت۔