منوج سنہاہَن کوٚر جھیری مٲلُک افتتاح۔

جموں و کشمیرٕکۍ لیفٹیننٹ گورنر منوج سنہاہَن کوٚر بوموارِ دۄہ مارہ سب ڈویژنَس منٛز جھیری میلُک افتتاح تہٕ کوٚرُن بابا جیتو تہٕ بووا کوری ہٕنٛدٮ۪ن سمادھیَن ہُنٛد دورٕ۔
اَتھ موقعَس پٮ۪ٹھ کوٚر منوج سنہاہَن یاترین باپتھ اکھ کمیونٹی ہال تہٕ 4 ماڈیولر بس سٹاپ وقف تہٕ ترٛٲوٕنۍ مارہ سب ڈویژنَس منٛز سی ایس آرَس تحت گۄڈٕنِکِس ‘انڈور سپورٹس کمپلیکسٕچ’ بُنیاد
یہِ چھُ قٲبلِ ذِکر زِ جھیری مٲلہٕ یُس دَہن دۄہَن تام جٲری چھُ روزان چھُ پرٛٮ۪تھ ؤریہِ جمہِ کِس مضافاتَس منٛز واقعہٕ جھیری گامَس منٛز مناونہٕ یِوان۔
‘X’ پٮ۪ٹھ أکِس پوسٹَس منٛز ووٚن لیفٹیننٹ گورنرَن: ‘اَز کوٚر مےٚ مارا سب ڈویژن جمِس منٛز جھیری مٲلُک افتتاح تہٕ بابا جیتو تہٕ بووا کوری ہٕنٛدٮ۪ن سمادھیَن ہُنٛد کوٚرُم دورٕ ‘۔
پوسٹَس منٛز ووٚن تٔمۍ زِ: ‘اَتھ موقعَس پٮ۪ٹھ آو زائرینن باپتھ اکھ کمیونٹی ہال تہٕ 4 ماڈیولر بس سٹاپ وقف کرنہٕ، تہٕ سی ایس آرَس تحت آیہِ گۄڈٕنِکہِ ‘انڈور سپورٹس کمپلیکس’ ہٕنٛز سنگ بنیاد مارہ سب ڈویژنَس منٛز ترٛاونہٕ’۔