شوپیان کہِ اکہِ رہٲیشی مکانہٕ منٛزٕ چرٕس ہیوٗ مادٕ برآمد : پولیس

باقٲعدٕ منشیاتن خٕلاف کاروٲیی جٲری تھٲوِتھ چھُ جموں و کشمیر پولیسَن جنوٗبی کٔشیٖرِ ہٕنٛدِس شوپیان ضِلعہٕ کِس رابن زِیناپورہ علاقَس منٛز أکِس رہٲیشی مکانَس منٛز اکھ کِلوگرام کھۄتہٕ زِیٛادٕ چرٕس ہیوٗ ممنوعہ مادٕ برآمد کوٚرمُت۔

پُلیٖس ترجمانَن ووٚن أکِس بیانَس منٛز زِ زِنا پوٗرہ پُلیٖس تھانن کٔر أکِس تصدیٖق شُدٕ خُفیہ حِصَس پٮ۪ٹھ کاروٲیی کٔرِتھ این ڈی پی ایس ایکٹَس تحت 117/2025 نمبرَس تحت ایف آئی آر درٕج تہٕ کوٚرُن فرسٹ مجسٹریٹ کورٹ، شوپیان پٮ۪ٹھہٕ تلاشُک وارنٹ حٲصِل۔

تٔمۍ ووٚن زِ زینا پورہ پولیس تھانٕکۍ أکۍ ٹیٖمَن ترٛوو ایگزیکٹو مجسٹریٹَس سۭتۍ مِلِتھ زِینا پورہَس منٛز روزَن وٲلِس خورشید احمد یاتو سٕنٛدِس گھرَس پٮ۪ٹھ چھاپہٕ۔

پُلیٖس ترجمانَن ووٚن زِ تلٲشی دوران آو گَرٕ منٛزٕ 1.202 کِلوگرام چرٕس ہیوٗ ممنوعہ مادٕ برآمد کرنہٕ۔

تٔمۍ ووٚن زِ مُلزِم چھُ فرار تہٕ أمِس رٹنٕچ کوٗششہِ چھےٚ جٲری۔

تٔمۍ ووٚن زِ پولیس چھِ معاشرَس منٛز نشاور ادوِیات ختم کرنہٕ باپتھ پرعزم ۔