سرینگرَس منٛز این ڈی پی ایس ایکٹَس تحت 20 لَچھن رۄپین ہٕنٛز جایداد ضبط : پُلیٖس

منشیاتَن خٕلاف کریک ڈاؤن جٲری تھٲوِتھ کٔر سرینگر پولیسَن این ڈی پی ایس ایکٹَس تحت 20 لَچھن رۄپین ہٕنٛز غٲر منقولہ جائیداد ضبط۔
پُلسہٕ ترجمانَن ووٚن أکِس بیانَس منٛز زِ سری نگر پولیسَن چھےٚ این ڈی پی ایس ایکٹَس تحت تقریباً 20 لَچھن رۄپین ہٕنٛز أکِس کنالس پٮ۪ٹُ ترٛےٚ پۅہر رہٲیشی عمارت منسلک کٔرمٕژ۔
تٔمۍ ووٚن زِ یہِ جایداد چھےٚ شال ٹیننگ کِس روزَن وٲلِس غلام محمد بٹ سٕنٛدِس نیچوِس فیاض احمد بٹ سٕنٛز یُس شال ٹینِگٕکِس روزَن وٲلِس بدنام ڈرگ ڈیلر منظور احمد بٹ سُنٛد مول چھُ۔
تٔمۍ ووٚن زِ مُلزِم چھُ پامپور پولیس تھانس منٛز ایف آئی آر نمبر 98/2025 تحت درٕج این ڈی پی ایس ایکٹ کٮ۪ن مُتعلقہٕ دفعاتن منٛز مُلوث۔
ترجمانَن ووٚن زِ تٔحقیٖقاتَس دوران گوٚو یہِ ثٲبت زِ یہِ جایداد ٲس منشیاتٕچ تجارت ذٔریعہٕ حٲصِل کرنہٕ آمٕژ۔
تٔمۍ ووٚن زِ یِمَن نتیجَن پٮ۪ٹھ عمل کٔرِتھ چُھ مجاز اتھارٹی این ڈی پی ایس ایکٹ کِس دفعہٕ 68-F تحت ضبطی کرنُک حُکُم جٲری کوٚرمُت۔
تٔمۍ ووٚن زِ اٹیچمنٹٕچ کاروٲیی چھےٚ ایگزیکٹوو دٔسۍ انجام دِنہٕ یِوان۔