کٔشیٖرِ منٛز آو اکھ بٔڑ سائبر کرٛایِم گینگ بے نقاب کرنہٕ، 7 گِرِفتار.

جموں و کشمیر پولیسٕک انٹیلی جنس یونٹَن چھُ أکِس منظم سائبر کرٛایِم گینگُک بے نقاب کوٚرمُت تہٕ سَتھ نَفر چھِ گِرِفتار کٔرِمٕتۍ۔ گِرِفتار کرنہٕ آمٕتۍ نفرَن پٮ۪ٹھ چھُ مُلکی تہٕ غٲر مُلکی شہریَن آن لایِن دھوکھہٕ دِنُک الزام تہٕ تِم ٲسۍ کرور رۄپیہِ ہٕنٛدِس لین دینس منٛز مُلوث۔ اَکہِ سرکٲری بیانَس مُطٲبِق بنٲو کاؤنٹر انٹیلی جنس کشمیر (سی آئی کے) تہٕ کِرٛمنَل انویسٹی گیشن ڈیپارٹمنٹَن خفیہ کال سینٹرَو ذٔریعہٕ دھوکہ دہی ہٕنٛز معلوٗمات حٲصِل کرنہٕ پتہٕ خصوٗصی ٹیٖمہٕ۔ تحقیٖقاتَس دوران آیہِ نگرٲنی کرنہٕ، ڈِجٹل معلوٗمات جمع کرنہٕ تہٕ مُختٔلِف مقامَن ہُنٛد معٲینہٕ کرنہٕ پتہٕ سری نگر کِس مضافاتَس منٛز رنگرتھ کِس صنعتی علاقَس منٛز أکِس اہم مرکزٕچ نشاندہی کرنہٕ۔ چھاپَس دوران ٲسِکھ سَتھ شکاوَر افراد موقعہٕ پٮ۪ٹھے گِرِفتار کٔرمٕتۍ تہٕ بٔڑِس مِقدارَس منٛز آو ڈیجیٹل تہٕ رٲبطُک سامان ضبط کرنہٕ، یَتھ منٛز 13 موبایِل فون، 9 لیپ ٹاپ، وی او آیی پی سسٹم، سِم کارڈ، نیٹ ورکنگ آلہٕ تہٕ ڈیجیٹل سٹوریج شٲمِل چھِ۔ مشکوک افرادَن خٕلاف چھِ دھوکہ دہی ، مُجرمانہٕ سٲزِش تہٕ آئی ٹی ایکٹ کِس مُتعلقہٕ دفعاتن ہٕنٛدِس الزامَس تحت مقدمہٕ درٕج کٔرمٕتۍ۔