عید میلاد نبی صلی الله عليه وسلم موقعس پٮ۪ٹھ وادی کٔشیٖرِ منٛز مسجدن تہٕ خانقاہَن مَنٛز  عقیدت مندَن ہُنٛد  جمہٕ گوٚٹ۔مُختلِف علاقن منٛز منعقد گژھن واجنٮ۪ن تقریبن ہُنٛد بنیٲدی پیغام اوس پیغمبر صلی الله عليه وسلم، امن، اخوت، رحم تہٕ انسانیتٕچ خدمت۔ 

درُس مُلکٕکۍ پٲٹھۍ آیہِ پیغمبر محمد مصطفیٰ صلى الله عليه وسلم سٕنٛز عید میلاد نبی جموں و کشمیرس منٛز مذہبی عقیدت، احترام تہٕ جوشہٕ سان مناونہٕ۔ وادی کشمیر کٮ۪ن مُختلِف ضِلعن منٛز آیہِ مسجدَن، مزارَن، خانقاہَن تہٕ باقٕے مذہبی مرکزَن منٛز مِلاد خٲطرٕ خصوٗصی اجتماع، خطبہٕ تہٕ تبلیغ، نعت تلاوت ، دُروود سوزنہٕ تہٕ دُعا کرنہٕ، ییٚلہِ زَن واریاہَن علاقَن منٛز آیہِ پُر امن جلوسہٕ تہِ منعقد کرنہٕ۔ 

وادی منز سپدن والین اہم عید میلاد النبی صلى الله عليه وسلم تقریبن منز سپد حضرت بُل سرینگر کِس آسر شریف مزارس منز اجتماع یتھ منز بٔڑِس تعدادس منز عقیدت مند شرکت کٔر۔ جنوبی کشمیرس منٛز تہِ آیہِ استارتن تہٕ خانقاہَن پٮ۪ٹھ خصوصی اجتماع کرنہٕ، یِمن منٛز حضرت بُل خیرم، کعبہ مرگ، اننت ناگَس منٛز کایموہ، پلوامہ تہٕ شوپیاں شٲمِل چھِ۔ یِمَن مذہبی اجتماعن مَنٛز کٔر عالمو پیغمبر صلى الله عليه وسلم سٕنزِ زندگی تہٕ تعلیمات تہٕ تٔمۍ سٕندِس عظیم کردارس مُختلِف پہلوون پیٹھ بحث۔