ایل او سی نزدیٖک آو شَک آوَر پٲکِستٲنۍڈرون لبنہٕ، پوٗنٛچھ تہٕ راجوری منٛز گٔیہِ تلٲشی کاروٲیی شُروٗع۔

حکامَو مُطٲبِق آو جموں و کشمیر کِس پوٗنٛچھ ضِلعَس منٛز لائن آف کنٹرول نزدیٖک علاقَن منٛز اکھ شَکاوَر پٲکِستٲنۍ ڈرون وُڑان وُچھنہٕ، ییٚمہِ پتہٕ سیکورٹی فورسَن بَٹہٕ وارِ دۄہ صُبحٲے علاقَس منٛز تلاشٕچ کاروٲیی شُروٗع کٔر۔

حکامَو وون زِ ڈرون آو جُمعہ شامَس بالاکوٹَس نزدیٖک بیروتی گامَس منٛز مندھر سیکٹرَس منٛز وُچھنہٕ، یُس سرحدَس نزدیٖک منگل نور/ڈبروٹ کُن گوٚو تہٕ پتہٕ آو پاکستان واپس۔ تِمَو ووٚن زِ ایل او سی یَس پیٹھ نظر تھاوَن وٲلۍ فوجیَو چھِ نگرٲنی سخت کٔرمٕژ تہٕ یہِ معلوٗم کرنہٕ خٲطرٕ چھِ صُبحس تلاشٕچ کاروٲیی شُروٗع کٔرمٕژ زِ ڈرونَن چھا کانٛہہ شَکاوَر مواد تروومُت یا تُلمُت۔

حکامَو ووٚن بیٚیہِ زِ تلاشٕچ کاروٲیی چھِ وُنہِ تہِ جٲری تہٕ سیکورٹی فورس چھِ سرحدَس پٮ۪ٹھ ہائی الرٹ پیٹھ۔ تِمَو ووٚن ووٚن زِ أتھۍ دوران چھِ شَکاوَر نقل و حرکتٕچ اطلاعہٕ پتہٕ پولیس، فوج، تہٕ نیم فوجی اہلکارَو اُدھم پور، کٹھوعہ تہٕ راجوری کٮ۪ن وسیع جنگلی ضِلعن منٛز بٔڑِس پیمانَس پٮ۪ٹھ تلٲشی کٔرمٕژ۔