بی جے پی ضِلعہٕ جنرل سیکریٹری عابد ننگروَس خٕلاف نوکریَن تہٕ اَمرناتھ یاترا خٍمہٕ اجازت نامَس پٮ۪ٹھ  دھوکہ دہی ہُنٛد مقدمہٕ درٕج.

جموں و کشمیر اننت ناگ پولیسَن چُھ سِیٲسی رہنُما عابد حسین ننگروَس خٕلاف شری امرناتھ جی یاتراہَس دوران سرکٲرۍ نوکریَن ہُنٛد انتظام کرنہٕ تہٕ پہلگامَس منٛز خیمہ لگاونٕچ اجازت نامہٕ حٲصِل کرنہٕ کِس ناوس پٮ۪ٹھ لچھَن رۄپیہِ ہُنٛد مُبینہٕ گھوٹالَس منٛز مقدمہٕ درٕج کوٚرمُت۔ عابد ننگرو چھُ بھارتیہ جنتا پارٹی سۭتۍ وابستہٕ تہٕ چھُ اننت ناگَس منٛز ضلعہٕ جنرل سیکریٹری سٕنٛدِ حشیتہٕ کٲم کران۔پُلسہٕ مُطٲبِق آیہِ پُلیٖس پوسٹ خانابلس پٮ۪ٹھ حسن نور، ایش مقام کِس روزَن وٲلِس غلام نبی ایتو سٕنٛدِس نیٚچِوِس وحید احمد ایتو سٕنٛدِ طرفہٕ اکھ تحریری شِکایت موصول گٔمٕژ، یُس وٕنکینَس جی ڈی سی بوائز ہاسٹل خانابلس منٛز روزان چھُ۔ شِکایتَس منٛز اوسُکھ اِلزام لگوٚومُت زِ کرانڈی گام، باج ہارا، اننت ناگ کِس روزَن وٲلۍ غلام حسن ننگرو سٕنٛدِ نیٚچِوِ عابد حسین ننگروَن چھُ مبینہ طور پنُن سیٲسی اثر و رسوخ استعمال کرنُک داعوا کٔرِتھ شکایت کنندَس گمراہ کوٚرمُت۔