یِنہٕ والٮ۪ن 24 گھنٹَن دوران جموں و کشمیرَس منٛز وُزملہٕ گگرایو سان روٗد پٮ۪نُک امکان۔ سری نگرَس منٛز   32.9 ڈگری سیلسیس درجہ حرارت ریکارڈ ۔محکمہٕ موسمیات مُطٲبِق ہیکہِ سرینگرَس منٛز درجہٕ حرارت 34°C تہٕ جوٚمَس منٛز 36°C تام وٲتِتھ۔۔

جموں و کشمیرٕچ رٮ۪تہٕ کالہِ رازدٲنی سری نگرَس منٛز آو زیادٕ کھۄتہٕ زِیٛادٕ درجہٕ حرارت 32.9°C ریکارڈ کرنہٕ، یُس وادی کشمیر خٲطرٕ معمول کھۄتہٕ تقریباً 3 پیٹھٕ 5 ڈگری زیادٕ چھُ۔ ہِنٛدُستان محکمہٕ موسمیات (آی ایم ڈی) چُھ یِنہٕ والٮ۪ن 24 ہن گٲنٛٹن دوران پوٗرٕ علاقَس منٛز الگ تھلگ جاین پٮ۪ٹھ ہلکہٕ پٮ۪ٹھٕ درمیٲنی روٗد پیٚنٕچ پیشن گویی کٔرمٕژ۔

سرینگرٕک موسمیات مرکزَن دِژ اطلاع زِ پٔتِمٮ۪ن 24 گھنٹَن دوران اوس کٔشیٖرِ کٮ۪ن واریاہَن حِصَن منٛز زِیٛادٕ کھۄتہٕ زِیٛادٕ درجہٕ حرارت معمول کھۄتہٕ 3 پٮ۪ٹھٕ 5 ڈگری زیادٕ، ییٚلہِ زَن جموں ڈویژنَس منٛز اوس تِم معمول کھۄتہٕ 2 پٮ۪ٹھ 3 ڈگری زیادٕ۔

جموں ڈویژنَس منٛز آو کتھواہَس منٛز ساروٕے کھۄتہٕ زِیٛادٕ درجہٕ حرارت 35.6°C ریکارڈ کرنہٕ۔  ساروٕے کھۄتہٕ کم درجہٕ حرارت آو کٔشیٖرِ ہٕنٛدِس گُلمرگَس منٛز 12.1°C تہٕ بھدرواہَس (جموں ڈویژن) منٛز 16°C درجہٕ حرارت ریکارڈ کرنہٕ۔