شُمٲلی کٔشیٖرِ منٛز جماعت اِسلامیس سٍتۍ وابسطہٕ غٲر منقولہ جایداد منسلک ۔ منسلک جایدادَس منٛز چھے2عمارتہٕ، 6دُکان تہٕ زٕ کنال زمین شٲمِل۔
شُمٲلی کشمیر کِس بارہمولہ ضِلعَس منٛز کٔر جموں و کشمیرٕک پولیسَن ممنوعہ جماعت اسلامی جموں و کشمیرَس سۭتۍ وابستہٕ جایدادَن خلاف اکھ بٔڑ کاروٲیی تہٕ کوٚرُکھ غٲر منقولہ جائیداد ضبط ۔ پولیسٕچ یہِ کاروٲیی آیہِ غٲر قونوٗنی سرگرمین (روک تھام) ایکٹَس تحت قونوٗنی کاروٲیی پتہٕ مُکمل کرنہٕ، یَتھ دوران ڈورو، سوپورَس منٛز زٕ عمارتہٕ، شےٚ دُکان تہٕ زٕ کنال زٔمیٖن ضبط آیہِ کرنہٕ۔
سوپور پولیس تھانس منٛز یو اے (پی) ایکٹ کِس دفعہٕ 10 تہٕ 13 ہَس تحت درٕج ایف آئی آر نمبر 42/2025 کِس تحقیقاتَس دوران آیہِ جائیداد منسلک کرنہٕ۔ سوپور پُلیٖس کہِ طرفہٕ جٲری کَرنہٕ آمٕتہِ أکِس پریس ریلیزَس مُطٲبِق، لَگاتار تفتیش، سرکٲرِ تہٕ مٲلِیہ رِکارڈ چیک کرنہٕ تہٕ مُتعلقہٕ حُکامن ہِنٛدِ طرفہٕ تصدیق کرنہٕ پتہٕ آیہِ یہِ کاروٲیی کرنہٕ تِکیٛازِ یہِ جایداد اوس واضح پٲٹھۍ جماعت اسلامی جموں و کشمیرَس سۭتۍ وابسطہٕ لبنہٕ آمُت۔