بی جے پی پارٹی کوٚر احتجاجَس دوران زنانہٕ حراساں کَرن وٲلِس نفرَس نِشہِ لاتعلقی ہُنٛد اظہار۔

بھارتیہ جنتا پارٹی (بی جے پی) جموں و کشمیر یونٹَن چھُ أکِس وائرل ویڈیوَس منٛز وُچھنہٕ یِنہٕ وٲلِس شخصَس سۭتۍ کُنہِ تہِ رٲبطہٕ نِش اِنکار کوٚرمُت، یَتھ منٛز سُہ سری نگر کِس ہری سنگھ ہائی سٹریٹَس پٮ۪ٹھ أکِس احتجاجَس دوران أکِس زنانہِ مبینہ طور حراساں کران چھُ۔ أکِس بیانَس منٛز ووٚن بی جے پی جے کے سرکٲری میڈیا انچارج ایڈووکیٹ ساجد یوسف شاہَن زِ پارٹی چھِ مُختٔلِف ذرایعو پٮ۪ٹھٕ معلوٗمات حٲصِل کٔرمٕژ تہٕ یہِ چھُ لبنہٕ آمُت زِ ویٖڈِیوَس منٛز وُچھنہٕ یِنہٕ وٲلِس نفرَس چھُنہٕ بی جے پی یَس سۭتۍ کانٛہہ وابسطہٕ۔ تٔمۍ ووٚن زِ نامعلوم تہٕ غٲر وابستہٕ نفر ہیکَن بٔڑٮ۪ن عوٲمی اجتماعَن منٛز شٲمِل گژھِتھ تہٕ یِم گژھِ نہٕ پانَے نٲظمَن یا بی جے پی یَس سۭتۍ منسوب کرنہٕ یِنۍ۔ تٔمۍ ووٚن بیٚیہِ زِ اتھ منٛز شٲمِل نفرَن ہٕنٛز شناخت علاوٕ چھِ زنانہِ ہُنٛد بُتھ شایع کرن والٮ۪ن پورٹلَن ہٕنٛز شناخت کرنٕچ کوٗشِش جٲری۔