وسطی کٔشیٖرِ منٛز انکاونٹر، اکھ دہشت گرد ہلاک۔
وسطی کشمیر کِس بڈگام ضِلعَس منٛز چھُ سیکورٹی فورسَن مُشترکہٕ تلاشی کارروٲیِیَس منٛز گولہِ ہٕنٛدِس تبادلَس دوران اکھ نامعلوم دہشت گرد ہلاک کرنُک داعوا کوٚرمُت۔ فوجٕکہِ چِنار کورپسَن کٔر سوشل میڈیا پلیٹ فارم ‘ایکس’ پٮ۪ٹھ أکِس پوسٹَس منٛز اَمیُک تصدیٖق زِ بُڈگام کِس اشدرگلی علاقَس منٛز چھُ آپریشن مخصوٗص تہٕ خُفیہٕ زانکٲری ہِنٛدِس بُنیادَس پٮ۪ٹھ شُروٗع کرنہٕ آمُت۔
فوجہِ مُطٲبِق ٲس ہِنٛدُستٲنہِ فوج، جموں و کشمیر پولیس، تہٕ سیٚنٛٹرٛل ریزرو پُلیٖس فورس (سی آر پی ایف) ہِنٛز مُشترکہٕ ٹیم علاقَس منٛز تلٲشی کران ییٚلہِ تِمَن کینٛہہ شَکاوَر حرکتہٕ وُچھ۔ سیکورٹی فورسَن کوٚر شَکاوَر نفرَن چیلنج ، یِمو پتہٕ افسرَن پٮ۪ٹھ گولہِ چلاوٕنۍ شروٗع۔ اَمہِ کِس جوابَس منٛز دِژ سیکورٹی فورسَن جوابی گولہِ، ییٚمہِ کِس نتیجَس منٛز دۄشوٕنی فریقن درمیان گولہِ ہُنٛد تبادلہٕ گوٚو۔
فوجَن ووٚن زِ کاروٲیی دوران گوٚو اکھ دہشت گرد ہلاک تہٕ اکھ اے کے سیریز رائفل تہٕ باقٕے جنگی سامان آو جایہِ پٮ۪ٹھٕ برآمد کرنہٕ۔ وونہِ گو٘ فوجَس مُطٲبِق چھِ علاقَس منٛز تلاشٕچ کاروٲیی وُنہِ تہِ جٲری۔