‘لوٗکَن خٲطرٕ آواز تُلنُک چُھ یہِ سزا دِنہٕ یِوان: میرواعظ کشمیر
میرواعظ کشمیر مولوی محمد عمر فاروقَن ووٚن جُمعہ دۄہ بیٚیہِ اکہِ لٹہِ گھرس منٛز نظر بنٛد کرنٕچ اطلاع دِوان: "جامع مسجدِ ہُنٛد منبر ژھۄپہٕ کرنٕچ تہٕ لوٗکَن ہٕنٛدِ خدشاتٕچ آواز تُلنہٕ، تِہنٛدین حقوقن ہُنٛد دفاع کرنہٕ تہٕ انصاف خٲطرٕ کھڑا گژھنٕچ سزا دِنٕچ پالیسی چھِ بلا روک ٹوک جٲری۔ از جمعہ دۄہ آو بہٕ بیٚیہِ گھرس منٛز نظر بنٛد کرنہٕ۔”
سوشل میڈیا پلیٹ فارم ایکس پیٹھ أکِس پیغامَس منٛز ووٚن میرواعظَن زِ: "ییٚلہِ مےٚ ربیع العوال کِس مبارک ماہ کِس سلسلَس منٛز جامع مسجد سری نگرَس منٛز مجلس رحمت العلمیٖن علیہ السلامَن (صلی اللہ علیہ وآلہ وسلم) کِس أکِس تقریبٕچ صدارت کرٕنۍ ٲس تہٕ مےٚ آو جُمعہ دوہ خطبہٕ دِنہٕ خٲطرٕ گَرِ پٮ۪ٹھٕ گژھنہٕ نِش رُکاونہٕ”۔
تِمَن وون زِ أزِکِس خاص تقریبس دوران ٲسۍ سرکردہ عالمن پیغمبر صلی اللہ علیہ وآلہ وسلم سُند خراج تحسین پیش کرُن تہٕ دۄن خاص علمی کارنامہٕ تہِ اجاگر کرُن، یِمن منز گلزار احمد پارے سُند کٲشِرِ ترجمہٕ تہِ شٲمِل چھُ۔