صرف کتابہٕ تھاونہٕ سۭتۍ چھُنہٕ کانٛہہ مُجرِم بنان، ہایی کورٹن کٔر کشمیری سکالر تعلیمی محقق شفاعت مقبول وانی  سٕنٛز پی ایس اے حِراست منسوخ۔

جموں و کشمیر تہٕ لداخ ہایی کورٹَن دِیُت جموں و کشمیر پبلک سیفٹی ایکٹ (پی ایس اے) تحت شفاعت مقبول وانی سٕنٛز احتیاطی حِراست کالعدم قرار۔ ہایی کورٹَن کوٚر واضح زِ حٲکِم گٔے کانٛہہ  تہِ خاص تباہ کُن سرگرمی ثٲبِت کرنس منٛز ناکام ییٚمہِ سۭتۍ سُہ احتیاطی حراستس منٛز تھاوُن  غٲر ضروٗری گوٚو۔

جسٹس موکشا کھجوریا کاظمی سٕنٛدِ وٲحِد بینچن دِیُت یہِ فٲصلہٕ 2 ستمبر کیس نمبر ‘ایچ سی پی نمبر 312/2025′ منٛز۔ 3 ستمبر اپ لوڈ کرنہٕ آمتِس شیٚن صفَن ہِنٛدِس فٲصلَس منٛز آو 13 ستمبر 2025 کُپوارِ کہِ ڈِسٹرکٹ مجسٹریٹ سٕنٛدِ طرفہٕ جٲری کرنہٕ آمُت حِراستُک حُکُم نمبر ’27-ڈی ایم کے/پی ایس اے’ منسوخ کرنہٕ، تہٕ وانی آو "فوری طور احتیاطی حراستہٕ منٛزٕ یَلہٕ ترٛاونُک ہدایت دِنہٕ”۔