ایم بی بی ایس تہٕ بی ڈی ایس انٹرنَن ہٕنٛز ہڑتال تیز، میڈیکل کالجَ حُکامَن  ہٕنٛز احتجاج ختم کرنٕچ دھمکی۔ 

ایم بی بی ایس تہٕ بی ڈی ایس انٹرن طٲلبہِ عٔلِمن ہُنٛد احتجاج چھُ شیٚیِمہِ دۄہ جٲری، حکوٗمتَس سۭتۍ کتھ باتھ گٔیہِ ناکام ثٲبِت۔ اَمہِ پتہٕ کوٚر تِمو پنُن احتجاج تیز تہٕ چھِ یژھان چھِ  زِ حکوٗمت دِیہِ تِمَن تحریری یقین زِ تِہُنٛد وظیفہٕ یِیہِ أکِس رٮ۪تَس انٛدر انٛدر ہُراونہٕ۔ 

أتھۍ دوران چھُ کینٛہہ انٹرن طٲلبہِ عٔلِمَو الزام لگوومُت زِ تِمن چھےٚتِہنٛدِ کالج انتظامیہ طرفہٕ ہڑتال ختم کرنٕچ دھمکی دِنہٕ یِوان، تِکیازِ ہسپتالَن منٛز چھےٚمریضَن ہٕنٛز دیکھ بھال مُتٲثِر گَژھان۔ 

جموں و کشمیرَس منٛز چھِ تمام ایم بی بی ایس تہٕ بی ڈی ایس انٹرنشپ طٲلبہِ عٔلِم پنٕنۍ رٮ۪تہٕ وار وظیفہٕ 12,000 رۄپیو پٮ۪ٹھٕ 30,000 رۄپین تام ہُرراوٕنٕچ منٛگ کَران۔